Sipyat ni Cogtas

Gipasaka gyud sa kapolisan ang kasong kriminal batok sa radio blocktimer nga si Danilo Cogtas tungod sa nahitabo nga "tsunami scare" dinhi sa dakbayan niadtong Lunes sa miaging semana.

Ang kapolisan nangangkon nga dunay daghang saksi nga mitumbok ni Cogtas nga maoy nagsugod sa kaguliyang dihang kini misinggit didto sa Pasil nga ang tsunami nagdangadanga na.

Tungod sa ingon og tabanog nga gidak-on sa iyang media ID dali nga nituo ang mga tawo nga daan nang nalisang niadtong higayona tungod sa bag-ohay pa nga niigo nga linog.

Dali nga mikatap ang sayop nga balita sa nagdangarang nga tsunami ug miresulta sa pagpanagan sa bagang duot sa katawhan paingon sa mga bukirang dapit sa dakbayan.

Samtang nagsud-ong sa nangalisang nga mga tawo, si Cogtas giingong nibahakhak og katawa ug mapagarbohon pa nga nanabi didto sa usa ka sibyaanan sa telebisyon diin siya dunay programa uban sa mayor sa Talisay nga si Soc Fernandez.

Matud sa kapolisan nga si Cogtas nanabi didto sa sibyaanan nga kabahin na ang iyang pangalan sa kasaysayan sa dakbayan nga nakamugna sa lapad nga kalisang sa katawhan.

Kusganon hinuon ni niyang gihimakak. Nangangkon si Cogtas nga siya mismo biktima sa nahitabo.

Gani matud niya nga apil siya sa midagan paingon sa bukirang bahin sa Barangay Guadalupe niadtong higayona.

Sumala pa niya nga igo lang siyang mitawag sa iyang anak didto sa Talisay ug mimando nila nga modagan paingon sa bukid tungod kay maoy iyang nadunggan didto sa Pasil nga dunay tsunami nga moabot.

Matud niya nga ang ilang panaghinabi sa telepono uban sa iyang anak maoy posibling nadunggan sa mga tawo didto sa Pasil hinungdan nga siya maoy napasanginlan nga nagsugod sa "tsunami scare".

Kun tinuod ang pangangkon ni Cogtas nga nidagan siya didto sa Guadalupe og gabii na silang nikanaog pagbalik, nganong didto man siya sa usa ka TV station alang sa recording sa ilang programa?

Apan bisan pa niini nagtuo gihapon ko nga dili si Cogtas maoy nakaingon sa kaguliyang.

Ang tinuod nga hinungdan sa kalisang sa mga tawo mao ang kakuwang sa edukasyon maylabot sa tsunami ug ang dili klaro nga tsunami warning nga gipagawas sa Philippine Institute of Volcanology.

Pila ba nato ang nasayod unsay tinuod nga kahulogan sa tsunami alert level 2 nga gipagawas sa Phivolcs niadtong higayona?

Ang sipyat lang ni Cogtas hinungdan nga siya maoy napasanginlan tungod sa iyang kahambugero.

Kun wala pa siya manghambog nga nga siya maoy nakaingon sa hitabo dili unta siya mag-atubang og seryosong problema sa pagkakaron.

Lain niyang sipyat mao ang iyang pagkwentas sa ingon og nigo nga gidak-on sa media ID hinungdan nga dali siyang nailhan sa mga tawo didto sa Pasil ug maoy gipasanginlan.

* * *

[email protected]