Hunong kun parahon mo!

Alang niadtong mga drayber nga pahunongon sa mga traffic ug transportation law enforcers unya dili motuman, hinoon mosibat kay dunay salaud, makasugat hinoon og problema.

Kini maoy angay’ng matngonan sa mga drayber. Kinsa ba’y tag-iya niining motorsiklo nga ang plate numbers IH-6003. Kining maong motor gipara kini og LTO law enforcer diha sa Sitio Maracas, Lahug kaniadtong buntag sa Pebrero 24.

Mihunong na unta ang drayber apan pagkakita nga LTO ang mipara kaniya, mikalit lang pagpasutoy og padagan. Gisuwayan siya’g gukod apan misibat g’yud. Nasundan kining maong motor nga ang drayber wala mag-helmet, ang motor walay side mirrors, ug ang plaka walay sticker nga 2011. Masabtan nga wala kini mapabag-o ang rehestro.

Ang akong tambag sa mga drayber nga ayaw pagsibat kun parahon kamo kay nganong mahadlok man kamo nga parahon kun wala lang kamo’y sala?

* * *

Sa operation sa LTO-Task Force Alpha didto sa Gorordo Avenue kaniadtong Biyernes, dunay tawo nga nagmaneho og “big bike” nga gipara kay ang motor walay side mirrors.

Nabantayan nga expire usab diay ang rehestro, unya wala usa’y sound-reduction device nga gibutang sa iyang tambutso. Sipa kaayo og tingog ang maong motor.

Nangatarungan ang maong tawo nga higala niya ang usa ka LTO official ug nga wala pa siya’y kwarta nga iparehestro sa motor.

Ang LTO-Task Force Alpha mangayo lang og pasaylo kay lisud man usab kun pasayloon nato nga dili man basta-basta nga salaod ang pag-drive og sakyanan nga expire ang rehestro.

Kun maka-aksidente gud ang maong sakyanan nga expire og rehestro walay insurance company nga miabaga.

Pananglit tinuod nga ang tag-iya sa sakyanan naglisud gani pagbayad og renewal sa rehestro samot na nga wala siya’y budget nga motubag sa iyang kaakohan kun maaksidente.

Tumanon lang g’yud nato ang balaud.

* * *

Congratulations diay sa akong amigo – si Superintendent Aureo Sanchez – ang hepe sa Cebu City Traffic Group. “Koronel” na g’yud ang akong amigo. Mora’g bag-o pa kaayo sa akong kaisipan nga kaniadto ordinaryo lang siya nga sakop sa Metrodiscom intelligence division.

Palihug “my friend” ayaw sipyata pagdistino og Traffic Group patrol vehicle and personnel sa among mga operations dinhi sa dakbayan. Kami usab sa LTO andam moabag kun ang kapolisan manginahanglan og tabang atul sa ilang operations.

* * *

Ang among group commander sa LTO-Task Force Alpha nga si Yol Solibio mipahibalo nako nga sa dili madugay ipatuman na g’yud niya ang pagdistino og “Motorcycle Team” aron manakop sa mga drayber nga dili magpasiga og suga sa ilang pagmaneho diha sa karsada panahon sa gabii. Akong balikon pagpasabot nga ang dili pagpasiga sa suga nga mag-drive maisip nga “reckless driving” kay hayan makamugna kini og aksidente. Mahimong makaligis kay dili man makakita ang mga tawo nga may nagsingabot nga sakyanan sa ilang nahimutangan.

 Kun ibutang nato nga malooy ang nagpara ninyo kay mosiga man ang inyong suga, mahimong makit-an na usab hinoon ang uban ninyong mga sayop. Ang maayo pasigaa lang g’yud ang suga nga mag-drive sa karsada sa gabii aron dili na kamo parahon.