Naglaum ko nga tinud-on ni Mayor Michael Rama ang iyang pasalig nga dili niya labanan ang si bisan kinsa nga opisyal ug kawani sa Department of Public Services (DPS) nga mamatud-ang nakahimo’g sala pinaagi sa pag-overprice sa gipalit nga pyesa sa sakyanan.
Kun ako ang mayor, ako gayud ang maninguha nga mahibaw-an kun kinsa ang nagmaniubra sa pagpa-overprice ingon man sutaon nako kun ang hepe sa DPS nga si Engr. Dionesio Gualiza nalambigit ba sa anomalosong transaksyon.
Akong klarohon nga wala ko moingon nga apil si Gualiza sa binuang, apan sa Order Slip pagpalit og mahal kaayo nga mga pyesa sa sakyanan anaa ang iyang pirma nga miaprobar sa maong pagpalit.
Ang wala lang g’yud nako magustohi mao nga human nako gibulgar kining maong isyu gikan sa pasiunang resulta sa pakisusi ni Konsehal Ritchie Osmeña, daw nasuko kanako si Gualiza.
Kaniadto dali ra kaayo siya motubag kun mangutana ko pinaagi sa text message pero karon dili na. Dihang miatubang siya sa Cebu City Council nga hapit na lang mohilak kay dili kaayo maantigo manubag, akong giduol apan tulin pa’s manatad nga misibat.
Pastilan, nganong masuko ka man nako Engr. Gualiza nga igo ra man ko nagbalita sa giingong dili maayong kalihukan diha sa imong opisina? Ang tawo nga girelibohan ni Gualiza sa pagka canvasser ug maoy gipasanginlan nga mipaburot sa presyo, kay siya man ang nag-canvass, usa lang ka metro aide 1. Nganong gibutang man nimo siya sa maong pwesto? Alang nako kun ako ang paimbistigahon niining maong kaso, kun makita nga sad-an si Joel Obenieta nga gitudlo nimo nga canvasser bisan og siya metro aide 1 ra ang position, apil ka nga sad-an ug angay ka nga taralon sa hukmanan.
Nasayud ko nga kini si Gualiza buotan nga pagkatawo apan ambot nganong wala siya makabantay sa binuang diha sa gidumala niya nga departamento. Matud ni Konsehal Ritchie Osmeña nga dili ra overpricing ang iyang nadiskobrehan. Duna pay lain nga binuang apan dili lang usa namo ibutyag kay makabantay unya.
Tambag nako ni Engr. Gualiza nga ayaw kasuko kun mabalita ka o kaha kanunay ka nga mahisgotan sa lindog sa mantalaan. Kun maminaw ka nako, ang maayo nimong buhaton mao nga estoryahan nimo ang media unsay tinuod.
Kun tinuod man nga wala kay labot sa binuang sa imong departamento, dalia ang gihimo mo nga imbistigasyon, ayaw panalipdi bisan og ang maigo imong mga tinudlo o pinasulod sa trabaho.
* * *
Alang sa mga drayber aron dili madakpan motuman ra g’yud ta sa balaud. Ayaw padagana ang sakyanan nga walay kompletong suga, niadtong mga drayber sa PUJ, taxi ug bus dili magsinelas ug kinahanglang mag-uniporme.
Kinahanglang dili expire ang rehestro ug duna kamo’y valid driver’s license. Sagad nako mabantayan nga ang uban nga drayber sa PUJ ang lisensya walay “restriction code 3” apan nagmaneho og sakyanan nga ang timbang 4,800 kilos.
Ang uban usab nga drayber ang lisensya walay Restriction Code 1, apan nag-drive og motorsiklo. Ang ubang drayber nagmaneho og sakyanan nga adunay giguroy apan wala sila’y restriction code 7 ug 8, basi sa gibug-aton.
Ang ubang drayber gitugotan lang nga mo-drive og “automatic” vehicles kay restriction code 4 ra ang gihatag kanila, apan nag-drive og manual type vehicles.