Agik-ik sa tsunami

Bitoy: Nadakpan natong nagmotor nga nag-megaphone og tsunami gamit ang megaphone Loy.

 Buloy: Ha! maayo nuon. Unya napangutana na nganong nagsinggit-singgit siya og tsunami?

Bitoy: Wala daw siya mosinggit og tsunami oy. Nangita no siya sa iyang anak nga si Chona Mae. Sa kabisaya sa tonto ang nadungog nga singgit Tsunami! Tsunami! Tsunami! Tsunami!(Toink!/Ayay!)

Hehehehehehehehehehehehehehehe!

Human sa gibating kalisang sa sayop nga pahibawo sa tsunami mibanos sab dayon ang kahimuot. Dili lang tungod kay sayop ang impormasyon kun dili nanggawas ang mga makapagitik nga eksena sa nagtakodtakod nga kahadlok.

Duha ka klase ang gibati sa mga nagkaguliyang. Kalisang sa tsunami ug kalisang sa mga nalisang.(Toink!)

Matud pa ni Pader Soc Saldua nga nagmisa sa ABS-CBN Central Visayas Complex sa miaging adlaw diha noy naglubong sa sementeryo sa Carreta pagkadungog daw nga naay tsunami gibiyaan ang patay.(Agay!)

 Pero niay 3 ka managhigala naghambogay.

Buloy: Grabiha sa kahadlok sa among mga silingan bay tungod sa tsunami nanagan dayon sa bukid.

Menggoy: Mas grabe sa amo kay nag-ilogay og katkat sa lubi ug tag-as nga kahoy.

Bitoy: Layo ra nang inyo sa amo. Naghatod mi og patay pagkadungog namo nga dunay tsunami bulhot dayon og dagan.

Buloy/Menggoy: Ang nanghatod?

Bitoy: Ang patay(Toink!/Estoryaheeeeeeeeeeeeeee!)

Hehehehehehehehehehehehehehehe!

Diha noy Amerkano niapil og dagan pagdinaganay sa Colon.

Kano: (nagdagan) hey! why we are running?

Buloy: Just run, run for your life. Kusoga nong nakadagan sa Amerkano. pag-abot sa rr landon.

Kano: (gikutasan) Hey guys! do you know why we are running?

Menggoy: Tsunami is coming.

Misamot og bulhot nog dagan sa amerkano. pag-abot sa fuente kay false alarm man diay.

Bitoy: Hey Jo you run also for a false tsunami alarm?

Kano: Oh no! I thought this is fun run so I join them.(Toink!/Ayay!)

Estoryaheeeeeeeeeeeeeeee! Hehehehehehehehehehe!

 Walay kalainan sa sugilanon ni Pader Soc sa mga misakay dayon sa ilang mga sakyanan paingon sa Busay aron dili maigo sa tsunami. Pagkahibawo gyud nga dili diay tinuod.

Senyang: Sir nahadlok mo sa tsunami dili man tinuod.

Bitoy: Wala oy kinsay ingon nahadlok. Misaka mi diri kay mopalit mi og sweet corn.(Toink!/Estoryaheeeeeeee!)

Hehehehehehehehehehehehehe! 

Sa sobrang kalisang nabiyaan na sa uban ang ilang kabtangan. Mga sakyanan nga nagkadinumbolay wala nay Citomay(Toink!). Mga PUJ nga naatolan sa sayop nga alarma wala na mosubay sa rota(Toink!). Mga tawo nga nakakita sa nanagan miapil og dagan dihang nakasugat og laing grupo nga nanagan sugat nila mibalik sag dagan sa agi(Toink!).

Dihay mga banang nayawyawan kay dihang naalarma ang mga asawa gibiyaan.(Toink!) Mga eksena nga makapangise apan dili matukib kun tinuod pang mahitabo.

Hinaot ang maong kasinatian dili makapakompiyansa sa kinatibuk-an. Dili angay ang daling mataranta apan kinahanglan sab ang kaigmat sa pagbantay.

(emailad:[email protected])