Kamatayon sa usa ka bayani

Sa miaging Domingo ang pinalangga kong uyoan nga among gitawag og Uncle Pedro gitunod sa lubnganan. Gatosan ang mihatod kaniya sa lubnganan kana kay daghan man ang miila kaniya nga bayani sa local level.

Si Uncle Pedro ikawalo sa napulo ka igsoon. Ikaupat siya nga igsoon ni mama nga nahimong magtutudlo. Sama kang anhing Jaime A. Maguilimotan nga usa sab ka magtutudlo ug akong first cousin nabantog sab siya nga maoy nakapatahom sa mga tunghaan diin siya na destino.

Nabantog sab siya nga tigtambag sa mga batan-on aron moasenso ug makalingkawas gikan sa kakabos. Labaw sa tanan daghan siya og natabangan. Andam siya nga mokuha sa katapusan niyang sensiyo sa bulsa aron lang sa pagtabang sa tawo nga nagkinahanglan sa iyang panabang.

Usa sa nakadawat sa iyang tambag mao si Gaw Leo nga aduna na karoy mokapin sa 20 ka panaderia. Si Uncle Pedro ug Gaw Leo pulos nakapahimuot kanako kay si Uncle Pedro kanunay gayod nga magdala og tambal ngadto kang mama sa buhi pa.

Si Gaw Leo sab nga nindot og sakyanan kanunay sab nga moduaw kang mama ug magdala og slice bread ug mga dagkong mga isda.

Makalaom ka Uncle ug Gaw Leo nga dili ko gayod kalimtan ang inyong dalaygong buhat ngadto ni mama.

Si mama ug uncle anaa na karon nagpauraray sa sabakan sa atong magbubuhat.