BRGY INAYAWAN, CEBU CITY
“Diri sa sitio Cactus naghitak ang illegal nga drugas labi na ang shabu, display ra kaayo sa mga tawo pero wala gyud magpakabana ani ang among mga opisyal sa barangay nga dugay naman unta ning problemaha.”
BRGY CAMPUTHAW, CEBU CITY
“Naunsa naman ning among lugar Sir uy wala man makolekta ang mga basura hapit na mausa ka buwan, ang mga dili malata baho na kaayo kuyawan mi nga daghan ang magkasakit ani diri sa purok 4 lower.”
BRGY BINALIW, CEBU CITY
“Ang among karsada diri sir Jun daghan kaayo libaong problema ming mga tawo diri labi sa mga dunay motor wala gyud ni atimana hasta ang landslide diri wala gani hatagi og pagtagad sa among mga opisyal sa barangay.”
BRGY MOHON, TALISAY CITY
“Ireklamo lang namo ning dalan diri kay dagko kaayo ang mga libaong unya lapok pa gyod kaayo, ang nakaparat kay naa pa gyod ni mahimutang likod sa City Hall pero wala gyod tagda.”
BRGY TABOK, MANDAUE CITY
“Naay tawo diri nga dakodako sa mga tiglimpyo nga nagpaabang man sa mga manindahay og saging ug tempura diri og tag 50 pesos kada adlaw nga daplin man unta ni sa karsada tapad sa outpost.”
BRGY INAYAGAN, NAGA CITY
“Ang among barangay road kay libaong ug lapok kaayo kay wala man matiwas ang proyekto, ingon among mga opisyal nga wala daw mo-giveway ang tag-iya sa yuta unya among kapitan wala gyod magpakabana.”
BRGY SULSOGAN, BADIAN, CEBU
“Ang multicab sa barangay dili gyud magamit kay istrikto kaayo among kapitan, naa untay gikuhang driver pero magpabayad man sad og dako mao nga ang dunay pasyente mamatay nalang kay wa may ikahatag sa driver.”
BRGY MALBAGO, DAAN-BANTAYAN, CEBU
“Dunay dapit diri sa among karsada Sir nga guba na kaayo tungod kay nangliki na ang highway maglisod na gyod og agi bisan ang mga bus kuyawan mi simbako dunay madisgrasya kun dili madali ang pagpaayo sa karsada.”
BRGY KANLUHANGON, TABUELAN, CEBU
“Ang problema diri Sir kay ang kuryente hangtod karon wala gyod maabot sa among lugar labi na sa sitio Tagaytay, hinaut unta nga imo ming matabangan aron intawon makakita mi’g hayag diri.”
BRGY T PADILLA, CEBU CITY
“Sa F Villa pwerteng daghana sa mga adik nga mosulod diri kay mamalit og shabu, dunay tulo ka mga drug pusher diri ang ilang palitanan pero wala man gyud ni sila maronda sa mga polis.”
BRGY GUIMBAWIAN, PINAMUNGAJAN, CEBU
“Ireklamo lang namo ang karsada diri sa sitio Laka kay grabe na gyong gubaa Sir naa man untay mga konsehal nga nanimuyo diri pero hasta sila wala gyud mohatag aksyon ani kuyaw kaayo sa disgrasya.”
BRGY TAJAO, PINAMUNGAJAN, CEBU
“Palihog intawon mi’g pasusi aning nagkagrabe nga illegal nga drugas diri sa among lugar kuyawan mi basin maapil intawon ning mga batan-on diri labi na sa among mga anak kay klaro kaayo ang baligyaay.
* * *
Alang sa inyong mga reklamo text lang sa 09071678643