Ang pagpanghuwam

Ang paghuwam og butang nagpasabot nga ang maong butang imong iuli inighuman nimo’g gamit niini. Kun manghuwam ka og kuwarta nagpasabot nga imo kining ilisan sigun sa inyong gikasabotan.

Apan subo kaayo nga palandungon nga adunay tawo nga niabusar sa pulong “huwam”. Sama kini sa pulong gugma nga giabusaran na sab pag-ayo. Daghan ang misulti nga ilang gihigugma ang babaye. Apan human nila kini pahimusli ang naulahi ila nalang pasagdan sama sa baho nga basura.

Sa laing bahin ang pagpanghuwam ila na lang gihimo nga takoban sa pangayo. Kay mas dili man kaayo uwaw hunahunaon kun manghuwam ka kay sa mangayo. Ang tawo nga nagtuo nga sinsero ang imong pagpanghuwam nagtuo gayod nga siya imong bayran sa adlaw nga inyong gikasabotan. Apan naluya lang siya og pinaabot kay wala ka man gayod moabot.

Nganong dili ka man motug-an sa tinuod nga ang kuwarta nga imong gihuwaman imo diay’ng gipangayo. Mohuwam ka o mangayo? Palihug tug-an sa tinuod.