Fire truck naghakot og tubig para swimming pools

Unsa ba ang patakaran nga gisunod mahitungod sa paggamit sa mga fire truck nga gipamalit sa lalawigan sa Sugbo ug gipang-apod-apod sa iyang kalungsoran. Kini ang gusto nakong masayran tungod kay kaniadtong Sabado Pebrero 4 ang fire truck sa lungsod sa Dalaguete gigamit sa paghakot og tubig alang sa usa ka swimming pool nga gipanag-iya sa ginganlan og Vangie.

Sigun sa driver sa fire truck nga si Bobby Diuna ug nosle man nga si Edmundo Manal nga gimandoan sila ni Raydal Cisneros, administrative officer ni Mayor Ronald Allan Cesante kay maoy sugo sa naulahi nga pahakuton sila og tubig para sa swimming pool ni Vangie. Wala sila makaila sa apelyedo ni Vangie apan ilang giingon nga midonar kini sa ilang lungsod og ambulansiya ug barangay road.

Giasoy sa duha nga nagsugod sila sa paghakot og tubig pasado sa alas nueve sa buntag ug nahuman niana nang pagka alas siengko sa hapon. Ang tubig ilang gihakot sa Panagikan fire hydrant ug gihatod didto sa Barangay Coro diin nahimutang ang balay ni Vangie nga may swimming pool. Upat ka fire truck ang nahakot nga tubig gikan sa fire hydrant.

Si Fire Officer 2 Antonio Villahermosa sa Dalaguete Fire Station nga akong nahinabi kaniadtong Sabado sa gabii sa akong tulumanon Saksi Evening Edition sa DySS Super Radyo Cebu miingon nga wala siya masayod kun si kinsa ang gipananghiran nila ni Bobby Diuna ug Edmundo Manal aron gamiton ang fire truck sa paghakot og tubig alang sa swimming pool ni Vangie.

Si Fire Sr. Supt. Esmael Codilla ang Fire Marshall sa lalawigan nga ako usab nga nahinabi sa maong gabii miingon nga supervision lang ang ilang gahom sa mga fire truck nga iya sa kagamhanan sa lalawigan tungod kay ang lokal nga kagamhanan ang nagkontrolar niini. Ang ila lang mao nga makagamit sila niini kun ugaling adunay sunog pero ang lokal nga kagamhanan mao gayod ang nagkontrolar sa paggamit sa fire truck.

Ibutang ta nga ang lokal nga kagamhanan sa lungsod sa Dalaguete ang gitahasan sa pagkontrolar sa fire truck nga gipanag-iya sa lalawigan sa Sugbo pero apil ba sa power of control ni Mayor Ronald Allan Cesante ang pag pagamit sa fire truck sa paghakot og tubig para sa swimming pool sa usa ka pribadong tawo? Unsa ba ka special sa mayor si mam Vangie?

Ang tubig nga gihakot gikan sa fire hydrant libre ba kadto o mibayad si mam Vangie ngadto sa mayor para tubig sa iyang swimming pool?