Armas gubaon? Dili uy!

Naminaw ko sa mga balita sa radyo nga mihulagway nga depektoso kuno ang armas nga giisyu sa usa ka bag-ong polis kay ang bala dihang gipabuto wala molapos sa iyang sumbohan.

Dili man ko eksperto sa armas apan klaro kaayo nga dili ang armas maoy depektoso ana uy. Ang bala maoy deperensya nga posible nga kuwang ang pulbora mao nga walay pwersa nga motulod sa slug aron molusot sa sumbohan.

Kun depektoso pa ang maong armas kaniadto ra unta kana nga gireklamo sa daghang mga polis nga giisyohan niini? Awhagon nato ang mga polis nga dili magmantinil og mga bati nga bala.

Sigun sa report nga akong nadunggan nga bag-o ang polis nga giisyuhan sa maong .38 kalibre nga revolver. Dili man imposible nga “reload” ra ang maong bala mao nga basin og dili kadto “combat load.”

Apan kun ibutang nato nga depektoso g’yud ang maong armas, walay problema. Kun ang maong polis ania madistino sa dakbayan sa Sugbo, daghan kaayo nga .38 kalibre nga revolver ang City Hall nga mahimong magamit.

Mga “original” g’yud ang armas nga gipanag-iya sa City Hall apan ang problema kay daghan sa mga polis arte na man usab kaayo. Dili man modawat og .38 kay ang gusto nila kalibre 45 g’yud nga pistola.

Gitan-aw nako ang “stocks” nga armas sa City Hall nga anaa gitipigan sa General Service Office, daghan kaayo nga mga revolvers, sama sa “police positives,” ug daghan pa.

Napanid-an nako nga bisan ang .357 Magnum revolver wala nay ganahan nga motakin-takin kay gusto lagi sa mga polis, apil na gani ang mga kapitan sa barangay, kalibre 45 na ang gusto.

Kining mga armas nga semi-automatic sama sa kalibre 45 nga pistola kuyaw ni gamiton sa mga kuwang sa training kay dunay posibilidad nga maka-aksidente. Dili ikalimod nga daghan sa giisyohan niini ang kuwang og kinaadman kabahin sa armas.

Ang sagad mao ang kadtong dili pa bansay mogamit og armas mo-chamber-load sa kalibre 45 nga pistola, iyang balik-balikon, unya tangtangon ang magazine sa armas.

 Ang uban magtoo na nga wala nay bala kay gitangtang na man ang magazine, apan wala siya masayud nga sa pagtangtang niya sa magazine, duna pay bala nga nahabilin nga nasulod sa barrel ug wala pa ma-eject.

Dunay mga hitabo nga human gitangtang ang magazine gikablit sa tawo nga dili bansay sa armas, aw mibuto! Ang tukma nga himoon mao nga human matangtang ang magazine sa pistola, usbon pag-chamber aron nga kun dunay bala nga mahabilin sa magazine sa armas molugpot.

Apan “safe” g’yud kaayo nga bisan og gikasa na armas human matangtang ang magazine, kinahanglang tan-awon g’yud kun wala na ba g’yuy bala nga nag-ungot sa barrel kay duna may mga higayon nga mabali ang ejector nga maoy mobunlot sa bala gikan sa barrel.

Tambag nako sa mga tawo nga naghupot og armas, gawas lang niadtong eksperto na kaayo, nga bungkaga ninyo ang inyong armas aron masayod mo unsay mekasisim sa inyong pusil.

Pinaagi niini, masayud kamo nganong inigbuto sa kalibre 45 otomatik kini nga mo-chamber load og bala ngadto sa barrel. Mahibaw-an usab ninyo ngano nga matangtang ra ang kabhang human makabuto ug nganong molugpot ang kapsola gikan sa armas.

Dili maayo nga magdala-dala mo’g armas unya kun pabuthon ninyo dayon mobabag ang bala nga dili makasulod sa barrel daw sa matarantar na kamo.