Nagkainit ang panahon

Nagkainit karon ang panahon nga daw miuban usab sa nagkainit nga panaglantugi sa husay sa impeachment proceeding ni Chief Justice Renato Corona sa atubangan sa mga senador nga gipangulohan ni Senate President Juan Ponce Enrile. Giatangan kini sa minilyon ka mga katawhang Pilipinhon nga maoy hinungdan nga adunay pipila nga moundang sa pagtrabaho tungod kay adto na man magyampungad sa pagtan-aw sa tagsa-tagsa ka mga telebisyon.

Nagkasuhi ang gibati sa mga mananan-aw sa maong husay tungod kay adunay mopakita sa pagpabor kang CJ Corona ug adunay mopabor ngadto sa mga kongresista nga maoy nagpasaka sa maong reklamo ngadto sa hawanan sa Senado. Ang pagpakita sa maong husay pinaagi sa pag-live nga pagsalida sa telebisyon daw kasayuran sa katawhan sa pipila nga giluwatan nga mga pulong sa mga abogado.

Sama pananglit sa ilang giingon nga “fishing expedition of evidence” nga ang uban nga dili makasabot daw magkabuang sa pagpangutana sa mga abogado kun unsay buot ipasabot niini.

Adunay dili mga abogado nga mangahas sa paghubad sa maong pulong nga moingon nga nanarap og mga kamatuoran taliwala sa dakong lawod, adunay uban moingon nga namukot pa og mga ebidensiya ug daghan uban pa. Hinuon sa mga nanan-aw nga nagpaabot gayod sa linugdangan sa maong husay kun mapalagpot ba gayod sa katungdanan o dili si Corona subay sa gihan-ay nga mga reklamo sa 188 ka mga kongresista nga mipirma sa maong impeachment ni Corona.

Adunay uban nga makapangutana nga moarang-arang ba kaha ilang kahimtang sa pagpuyo kun matangtang na si Corona sa iyang katungdanan. Kun atong balikon paglili ang naghinapos nga mga bulan sa milabay’ng tuig maoy atong mahinumdoman ang kanunay nga pagbunok sa ulan nga nakamugna usab og mga pagbaha nga maoy hinungdan sa pagkabanlas sa mga kabtangan ug mikalas pa og kinabuhi sa pipila ka dapit dinhi sa nasud.

Gitapos ang mga adlaw sa miaging tuig sa kanunay nga pag-ulan nga maoy hinungdan usab nga atong nasinati ang kabugnaw sa panahon.

Daw mikilab lang ang milabay nga mga adlaw sa 2011 ug hingpit na usab nga natapos ang bulan sa Enero sa tuig 2012.

Ang unang mga adlaw sa bulan sa Pebrero niining maong tuig daw atong nasinati ang kainit sa panahon sanglit nagkaduol na man usab ang mga adlaw sa kuwarisma. Kining maong kainit nga atong masinati mahimo usab unyang kaluhaan sa lain pa nga kainit sa natad sa politika nga maoy timailhan nga nagkaduol na usab ang mga adlaw sa 2013 local election.