Pressure sa Malacañang

Modako og samot kanang away sa patubig sa Daanbantayan tungod kay gisakyan kini og politika.

Ang mga opisyal sa Tapilon Rural Waterworks System Association (TARWASA) identified man nga mga oposisyon sa Daanbantayan hinungdan nga bisan unsa nga mando ni Mayor Malou Loot, supakon kini.

Mao kini ang hinungdan nga ang chairman sa TARWASA nga si Claro Benatiro, igsuon ni Hiram Benatiro nga oposisyon sa Daanbantayan ug laing usa ka babaye gipadakop ni Kapitan Arturo Conejos tungod sa pag-pangulo sa mga empleyado niini pag-tap og balik sa linya sa tubig.

Daghan na kaayong mga estorya nga nanggawas mahitungod sa maong water system, apan kining mga isyoha manaog sa labing dakong hinungdan – ang politika sa Daanbantayan.

Dili na hinuon malilong ang gahum sa mga Loot nga nakagamot na diha sa Daanbantayan, apan ang kampo sa oposisyon pinanguluhan ni Engr. Itok Corro dili mohunong sa pagsulay sa pag-ilog sa teritoryo.

Apan tambag nako sa mga taga-Daanbantayan, sunod tuig naman gyud ang eleksiyon, hulaton na lang nato kini ug dili lang gyud kita mohangop sa kagubot.

* * *

Kining nagpadayon nga impeachment trial nakonektar gyud sa kasong giatubang ni kanhi National Bureau of Investigation director Magtangol Gatdula sa Department of Justice.

Si kanhi Supreme Court justice Serafin Cuevas miangkon nga adunay “pressure” gikan sa Malacañang nga paundangon siya isip abogado sa depensa sa nagpadayon nga impeachment trial ni SC chief justice Renato Corona bugti sa pag-atras sa kaso batok ni Gatdula.

Nahibaw-an diay nga si Cuevas ug Gatdula mga igsuon sa relihiyon, ang Iglesia ni Kristo.

Dili hinuon ko motuo nga madala lang sa ingon nga pressure si Cuevas. Kun igsuon lang sa relihiyon, dili kini bug-at nga rason nga moatras siya sa iyang pagka-abogado sa depensa.

Sa nagpadayon nga impeachment trial, naserbisyohan ni Cuevas ang depensa ni Corona. Milutaw ang ka-banga sa pipila ka mga prosecutors.

Apan ang ka-banga sa prosecutors wala hinuon makababag sa pagpresentar sa mga ebidensiya – ang Statement of Assets and Liabilities and Net Worth (SALN) ug ang kapakyas pagsang-at og Income Tax Return (ITR).

* * *

Aduna hinuoy pagduda nga usa sa pamaagi pagguba sa prosekusyon ang deklarasyon ni Cuevas nga gi-pressure siya sa Malacañang.

Kay nanggawas man ang mga ebidensiya nga nagpiit sa iyang kliyente nga si chief justice Corona, maghimo na lang sila og mga scenario aron gub-on ang kredibilidad sa pikas kampo.

Una nga tinguha nila mao ang pag-discredit ni senator-judge Franklin Drilon. Sumala pa sa habig sa depensa nga si Drilon nagpakita og bias pabor sa prosekusyon.

Apan wala gihapon maprobar sa habig sa depensa ang bias ni Drilon.Karon, gusto na usab nga ipakita sa depensa nga nag-apil-apil ang Malacañang sa impeachment trial aron pagwagtang sa kredibilidad niini. Ang pasangil ni Cuevas nagkanayon nga ang pressure mao nga paundangon siya isip abogado ni Corona, bugti sa pag-atras sa kaso ni Gatdula.

Si Gatdula gilambigit sa kasong kidnapping-extortion sa usa ka Haponesa nga si Noriyo Ohara. Ang DOJ maoy nag-imbestigar sa kaso karon.

* * *

Ang Barangay Cadulawan and Vito Eco-Agrotourism Project padayon nga tukion sa Rotary Club of Cebu Minglanilla bisan paman sa mga “misinformation” nga nanggawas mahitungod sa maong proyekto.

Nalipay lang ang mga project coordinators ug managers sa maong proyekto tungod kay ang mga mag-uuma sa Cadulawan ug Vito wala motuo sa bisan unsa na lang nga pasangil kalabot sa maong proyekto.

Isip usa sa mga project managers sa maong proyekto nga nagsulat sa mga konsepto niini, usa ko sa nasakitan nganong buhatan og dautan nga estorya ang proyekto.

Nalipay lang usab hinuon ko nga ang among presidente, Francis Gerard “Jigger” Cañedo wala mabugnaw sa walay basehan nga atake sa media, ug niadtong Sabado, atol sa pista sa sitio Bayong, barangay Cadulawan, gi-turnover ngadto sa mga mag-uuma pinanguluhan ni Bro. Boy Laroa ang daghang mga baril (drums) ug mga dagkong plastic (PE) hose alang sa mainline sa dakong patubig ngadto sa mga umahan nga sub-component sa eco-agrotourism project.

Karong Marso 3 (tentative pa lang hinuon), pormal nga ilusad ang proyekto dungan sa unang agrotourism fair sa Minglanilla nga adto himuon sa Cadulawan.