Mogula matag Martes ug Biyernes

Senior Citizens Night. Makita sa hulagway ang mga senior citizens sa Barangay Duljo Fatima pinangulohan ni Vita Padilla (nagdala sa imahen sa Balaang Bata) nga misalmot sa Senior Citizens Night sa naglakaw pa ang nobenaryo sa miaging Piyesta Senyor ning dakbayan.

Ang Duljo Fatima usa sa 11 ka barangay chapter sa kahugpongan sa mga senior citizens nga misanong sa pagdapit ni Dr. Maranga pag-Sinulog-halad alang sa kapiyestahan sa Santo Niño. Ang pasundayag nakahatag og dugang kasaya sa kasaulogan, nasaksihan, tapus sa alas 8 sa gabii nga Santos nga Misa sa miaging Enero 11, sa pilgrim center sa Basilica del Santo Niño.

Tipik sa 30 ka participants, makita sa hulagway, uban ni Vit Padilla, sila si Rosita, Cresing, Petra, Letty, Celing, Rosie, Presing, Bebe, Marga, Rose, Emma, Lyni, Melly, Lydia, ug Maura.

Ang ubang mga barangay nga misalmot, mao ang San Nicolas Proper, Basak San Nicolas, Ermita, Tisa, Punta Princesa, Pasil, Cogon Pardo, Hipodromo, Santa Cruz, ug San Roque.

Matud ni Padilla, matag kalihokan nga sama niini, kanunay nga mosalmot ang mga Senior Citizens sa Duljo Fatima, gumikan sa hingpit nga pagpaluyo sa ilang Kapitan sa Barangay, si Hon. Elmer L. Abella ug sa mga sakop sa konseho.

Mao kini ang mahitabo kun magkauyon ang kadagkuan sa barangay ug kapunongan sa senior citizen … aktibo ang mga senior citizen, ug kanunay magmalampuson ang mga kalihokan niini.

Sa mga barangay nga adunay duha, tulo, o upat ka pundok sa mga senior citizen (ambut ngano), sagad mahitabo, nga ang Kapitan adunay mga pagpinig, ug dili makig-alayon sa pundok kansang Presidente makapabukal sa iyang dugo. Di ni maayo!

Ang mahitabo, ang pundok nga dili maayo’g relasyon sa Kapitan, maglaway sa 1% nga allotment (kun duna man) alang unta sa tanang senior citizens sa barangay. Ambut nganong lisud usahon ang Pinoy. Daghan ang gustong mag-presidente.

Ako sa akong pagka-ako, purya buyag lang, mas ganahan kong molihok kun wala ako’y gihuptan nga position.

Anyway, paminaw ug interact sa Senior Citizens Hour sa DYRC 648 KHZ, matag Sabado 4:00-6:00 sa hapon, itaho ang kalihokan sa inyong chapter. Tels. 4125249, 4125298, 2388173.