Kahakog sa operators

Kun nituman nang bus operators sa bag-ong sugo sa nasudnong gobyerno, ang ilang mga drayber ug konduktor makadawat na sa pagpanuweldo karong semanaha sa mosunod:

• Labing menos P305 nga inadlaw’ng suholan;

• Overtime pay kun nilapas sa walo ka oras ang ilang trabaho matag adlaw;

• Night shift differential kun natunong og gabii ang ilang pamasahero; ug

• Service incentive pay nga magrepresentar sa ilang bahin sa kita sa operators apan ubos sa kundisyon nga wa sila mahilambigit og subsob nga mga aksidente ug kalapasan sa mga lagda sa trapiko.

* * *

Sa ilang pagkobra sa ilang mga suholan ug benepisyo karong semanaha, angay’ng susihon sa mga drayber ug konduktor kun giparehistro na ba sila sa ilang operator isip bag-ong mga sakop sa Social Security System (SSS) pinaagi sa pagbayad na sa pasiunang premium nga saw-an og bayad sa mga kawani (mga drayber ug konduktor) ug employer (operators).

Makapahimus na sab ang mga drayber ug konduktor sa mosunod nga mga benepisyo:Usa ka oras nga pahuway kun moabot og 12 ka oras ang iyang trabaho sa usa ka adlaw; usa ka adlaw nga pahuway sa matag semana; paternity ug maternity leave, parental leave ug uban pa.Sa pagtapos sa 2012, makadawat sila og 13th month pay ug annual service incentive leaves.

* * *

Inay mosugod na og patuman sa lagda nga giumol sa Land Transportation Franchising and Regulatory Board (LTFRB) ug Department of Labor and Employment (Dole), pipila ka bus operators sa Sugbo nipahibawo sa wa magkadimao nilang pagsupak:Sa sinugdanan, nihulga silang mokiha, dayon nanaway sa LTFRB nga wa sila konsultaha ug nangintriga pa gyod nga supak ang mga drayber ug konduktor sa lagda kay momenos ang ilang kita.

Wa hinuon molalis ang operators sa sukaranan sa lagda nga mao ang pag-iban sa mga aksidente sa kadalanan, sa paturagas sa buses ug pag-ilogay ug pasobrahay sa pasahero kay nag-apas ang mga drayber ug konduktor nga mas modako ang ilang komisyon gikan sa kita sa buses.

* * *

Gihangop sa mga drayber ug konduktor nga klaro nang ilang suholan ug mga benepisyo.Ang pasidaan nga mo-us-os ang ilang kita way sukaranan.Kay ang lagda wa magdili paghatag og mas dagkong suholan, igo lang nitakda sa labing gamay’ng madawat.Kun magpaugat ang operators pagbira sa inadlaw’ng suholan ngadto sa P305, ang labing takos nilang mga drayber ug konduktor madani sa mas makiangayong operators, ang mga taphaw ray mahibilin ug mohagba ang negosyo.

Ang hulga sa pipila ka operators nga sa employment agencies sila mokuha og mga drayber ug konduktor nagpaila sa ilang ka-ignorante.Kay bisan ang agencies gimandoan sa balaod paghatag og minimum nga suholan ug mga benepisyo sa labing ubos nga mga kawani.

Hinaot tumanon sa LTFRB nga isunod ang taxi drivers.

Email: [email protected]