Ang tubig

Usa sa mga balikonon nako didto sa may Odyssey sa SM mao kadtong mga Instrumental Music. Usa na niini kadtong CD nga ang tingog pulos lang tubig. Gawas nga relaxing ang maong honi panahon sa katulogon, ang tubig usa ka dakong pahinumdom alang kanatong mga tawo. Nga ang kinabuhi dunay bul-og ug sa laing bahin dunay kalutsan. Duna kita’y tagsa-tagsa ka lutsanan nga mopatighulog sa usa lamang ka padulngan ug kini mao ang kamatayon. Sa laing bahin ang tubig simbolo sa kinabuhi ug sa kamatayon. Dili kita mabuhi kun dili kita kainom og tubig apan mahimong mamatay kita kun malumsan kita diha sa tubig. Ingon ini ka gamhanan ang tubig.

Nahinumdom ako sa didto pa ako sa Carnaza kun unsa diay ka laay palandungon ang pag-inusara panahon sa kalisud. Apan ang nakanindot kay ang mga balod mipahinumdom kanako nga gikinahanglan diay ang pakigbisog sa hudlat ug hadla sa kapalaran. Walay makabuntog sa kakulba ikaw ra. Walay makasulbad sa imong mga suliran nga gidakdak kanimo sa uban kundili ikaw ra. Ug walay makakaplag sa imong kalipay nga gipangita kundili ikaw ra. Dili makahatag niini ang uban. Labaw na nga wala’y si bisan kinsa nga makapalipay nimo gawas kun pilion mo siya ingon nga imong kalipay. Mohilak ka man o magminatay dili ka na mao ang isyu. Ang isyu mao kun gikinahanglan pa ba nga duna kay pamatud-an aron ilhon ang imong katakos?