Pagpanambal ni Jesus

Atong nakita sa ebanghelyo karong Domingoha nga si Jesus nihimo sa iyang mga milagro diha sa pag-ayo sa mga masakiton ingon man ang paghingilin sa mga yawa. Kun atong langkobon ang maong buhat, kini nagpakita lamang sa tumong ug tuyo sa iyang ministeryo. Ang iyang ministeryo nahimugso alang sa kaluwasan sa tawo. Kaluwasan nga nagasukad diha sa Espirituhanon ug lawasnon nga aspeto. Buot ni Ginoong Jesus nga maluwas ang tawo lawas ug kalag. Ang yawa buot nga sakiton ang tawo. Kini tungod kay ang tawo gipangga man pag-ayo sa Dios. Kay kaaway man sa yawa ang Dios, natural lang pud nga kaaway niya ang tawo nga dagway ug kasamahan sa Dios.

Ning maong talan-awon sa panghitabo sa ebanghelyo kita gipahinumdoman ning mosunod:

1. Dili mahimong magmadaugon ang dautan batok sa maayo.

2. Ang yawa ingon nga atong kaaway mabuntog lamang dili sa atong kaugalingong katakos kun dili pinaagi sa gahom sa Dios.

3. Ang makanunayong pag-ampo ingon man ang pagdisiplina sa atong kaugalingon dako kaayo og kahimoan aron mabuntog nato ang yawa nga padayong molingla kanato.