Leksyon sa mga drayber

Naleksyon g’yud ang drayber og traysikol diha sa Mandaue nga mihatag sa iyang lisensya ngadto sa usa ka traffic enforcer nga wala mangayo’g temporary operators permit (TOP).

Ambot og unsa kaha ang iyang nahimong kasaypanan sa balaud sa trapiko nga gikuha man sa traffic enforcer ang iyang lisensya. Kun tuohan nimo ang sulti ni Dominador Languido, ignorante g’yud siya sa balaud bisan og edaran na siya.

Tiaw mo, human gikuha sa traffic enforcer ang iyang lisensya giingnan ra siya nga “Balika lang unya ko.” Nganong misugot man siya nga kuhaon ang iyang lisensya nga wala isyuhi og TOP?

Kun tuohan nimo ang pangangkon sa maong tricycle driver, makaduda ka nga kadtong enforcer nga mikuha sa iyang lisensya gusto nga mangwarta kaniya. Bisan og si Languido wala na’y lisensya, padayon siya nga namasahero. Nagpasakay og subra nga gidaghanon sa pasahero ug nagpadagan nga wala magpasiga sa headlight sa traysikol.

Gipara si Languido sa mga sakop sa LTO Task Force Alpha pag-agi niya sa checkpoint apan wala manumbaling. Gipara siya sa laing LTO agent, igo lang mipadaplin apan mipaturatoy gihapon pagpadagan.

Ang ikatulo na nga LTO agent maoy nakapahunong kaniya. Ang rason ni Languido nga wala siya makahunong dili kuno niya mapugngan ang traysikol sa iyang pagpadayon pagdagan.

Unsa? Kun mao na pananglit dunay bung-aw nga imong padulngan mahulog diay ang traysikol kay dili man siya makakontrolar sa sakyanan?

Dihang giduol nako ug gipangayoan sa iyang lisensya, walay gikahatag. Wala laing nahimo ang LTO gawas sa pag-isyu og TOP ug pagpa-impound sa traysikol nga ang plate number GZ-8831 kay maisip man nga nagmaneho siya sa sakyanan nga walay lisensya.

Kun makapresentar siya sa lisensya human niya makuha gikan sa giingong traffic enforcer nga misakmit niini nga wala moisyu og TOP, aw gamay-gamay ra ang multa, apan makabayad si Languido og P1,500 sa towing fee.

Ang leksyon niini kun nagpasiga pa og suga si Languido samtang nagmaneho, mahimong dili siya parahon sa LTO.

* * *

Laing tag-iya og sakyanan nakakat-on usab og leksyon. Ang iyang sakyanan nga walay plate numbers, iyang gipamaneho og tawo nga walay lisensya pag-drive og sakyanan.

Resulta, dakpan gihapon sa LTO Task Force Alpha. Ang drayber wala gani bisan usa na lang ka ID nga napakita dihang among gipangayoan. Grabeha lagi. Ang tag-iya miadto g’yud og nakapanglingo-lingo. Natural man g’yud nga mohangyo ang mga hingtungdan, apan wala sila’y swerte kay LTO Task Force Alpha ang nakadakop nga dili g’yud modawat og suborno.

Kun ang nakadakop mao pa kadtong traffic enforcer sa Mandaue nga mikuha sa lisensya ni Languido aw makakwarta g’yud unta ang maong abusado nga enforcer.

* * *

Ang abuso sa ubang traffic enforcers nga kusug kaayong modawat og suborno gikan sa madakpan nga draybers, maoy nakaaghat nako nga misulod sa pagka deputized agent sa LTO Task Force Alpha.

Buot nako nga tudloan ang mga drayber kun unsay tukma nga batasan sa tinuoray’ng law enforcer. Dili mangasaba sa madakpan (gawas lang og badlongon g’yud ang drayber) ug estrikto nga mopatuman sa balaud apan dili mangilkil.

Alang nako, kun maghiusa lang ang mga enforcer nga dili g’yud mangilkil, matudloan g’yud og leksyon ang abusadong mga drayber.