Sa gula sa The Philippine Star niadtong Enero 23, 2012 gipatik sa unang pahina niini ang mga feng shui sa mga manalagna bahin sa lakaw ekonomiya sa kalibotan ning tuiga, 2012.
Ang Amerika ug Uropa giingong padayong magsakuong sa kaapiki sa ilang ekonomiya human masinatii niini ang pagdahili sa ilang katigayonan pipila na ka tuig ang milabay.
Apan gitagna sa mga astrologer nga makabangon sa tuig 2013 ang Amerika, samtang ang Uropa unya pa sa 2014. Unya gitagna nga ang magda sa bida sa kapaspas sa pagsaka sa ekonomiya karong tuiga mao ang China ug Russia.
Apan ang Pilipinas kay gamay raman kining nasura wa kahisgoti sa mga astrologer nga taga China, kay daan namang gi-feng shui nga maayo kuno og lakaw ang ekonomiya sa atong nasud karong tuiga pinaagi sa mga tig - feng shui nga taga dinhi ra usab.
Apan samtang nagkadaiya ang mga panagna sa mga matawag nga propeta sa mga Insek, ang mga propeta usab sa mga Mayan, lumad sa South America, pintok kaayo og panagna nga sa Disyembre 21, 2012 matapos na kuno ang kalibotan.
Ambot ba sab oi, kun diin mamunit sila sa maong kasayoran , nga ang Biblia nga nagpatik sa mga pulong sa Dios bahin sa kataposan sa kalibotan mipahibawo man nga ang pagtapos sa kalibotan mao ang pagkanaog ni Kristo nganhi sa yuta.
Apan bisan si Kristo sa iyang kaugalingon miprangka nga wa siya masayud sa petsa sa iyang pagkanaog nganhi sa yuta kay ang bugtong nasayud ning tanan mao ra ang Dios nga Iyang amahan. Di ba?