Nasayud ako nga nabalda ang mga abogado sa prosekusyon sa pagtubag sa kanunay nga pagbaraw ni kanhi justice secretary ug associate justice Serafin Cuevas. Apan ang gusto sa katawhan mao ang kamatuoran dili legalidad.
Kining reklamo sa depensa nga bias ang ubang mga senator-judge dili angayang hatagan og pagtagad kay tawo ra usab sila sama sa mga dumadapig ni Chief Justice Renato Corona.
Akong pahibaw-on ang defense panel nga ang gipaabot sa katawhan mao ang pagladlad sa kamatuoran mao nga alang kanako walay sayop ang senator-judge nga motabang sa prosekusyon o sa laing habig aron pagpalugwa niini.
Giklaro kini nila ni Senator-Judge Miriam Defensor Santiago ug Peter Cayetano. Mao usab kini ang gihimo ni Senador-Judge Franklin Drilon. Buot nilang iyagyag ang mga ebidensiya ug ang depensa na ang mohimakak niini samtang pamatud-an kini sa prosekusyon.
Magubot na usab ang nasud kun pugngan ang pagpresentar sa mga ebidensiya sama sa wala pag-abli sa envelope atol sa Erap Estrada impeachment trial.
* * *
Niining panahon diin ang mga negatibong balita maoy kanunay natong mabasa sa mga pamantaan, madungog sa radio ug makita sa telebisyon, ang makalingaw kanako mao kining among tapoktapok sa White Gold café.
Samtang chopsuey kon saksak-sinagol ang hisgutan namong mga golden boys (senior citizens) uban sa mga balikbayan nga sila si Henry Seno, Lito Lao, Lando Labrador, ug Ed Recla- subakan usab kini kanunay og kantakanta dinuyugan sa ukulele nila ni Engr. John Lopez , usa ka Filipino-American nga ania karon sa Sugbo alang sa tinuig niyang bakasyon ug businessman Lao Rogero. Mosaling-it usab ang inilang abogado nga si Amor Cañete pinaagi sa pagpatokar sa mga piniling awit sa iyang IPad nga maoy moganoy kang Atty. Trans Daarol ngadto sa katulugon.
Samtang ako moapil sa paghisgut sa mga isyu kalabut sa politika ug sa nasud samtang maghigop og kape, akong itagana ang akong analysis ug komentaryo alang niining akong lindog ug sa programang Clearcut Tonight sa Cebu Catholic Television Network (CCTN) channel 47 uban kanila ni Atty. (Gen.) Fritz Quiñanola ug Freeman (Nation/World) editor Johnrey Saavedra, matag Miyerkules alas 9:00 – 10:00 sa gabi-i.
* * *
Si Engr. Lopez mipalanog sa iyang kabalaka sa kanunay nga pagsaway ni Kong. Tomas Osmeña kang Mayor Mike Rama. Buot niya nga pasagdan lang unta ang mayor sa pagtuman sa iyang gimbuhaton. Siya ra bitaw ang manubag sa mga botante inig-abot sa eleksiyon sa 2013.,
Apan daw sa nasayud si Engr. Lopez sa tinuod nga hinungdan sa kanunay nga pagpanaway ni Kong. Tomas ug ni Bise Mayor Joy Augustus Young kang Mayor Mike. Sumala niya nga klarex kaayo ang tumong ug tuyo nila.
* * *
Molansar gayud pag-usab si Kongresista Tony Cuenco sa south district sa Cebu City. Ang posibli niyang maka-atbang mao si Aristotle “Totol” Batuhan. Wala nay kahigayonan si graduating councilor Bebot Abellanosa nga modagan sa pagka-kongresista ubos sa BOPK o kaha sa ticket ni Mayor Mike. Kun buot man gayud siyang molansar mag-independente siya.
Atong huwaton kun unsa ang hukom sa taga-south district niining return bout nila ni Totol ug Tony. Kaniadto gud nga diha pa si Tony sa BOPK gidabodabohan man niya si Totol. Karon nga si Totol na ang paluyuhan ni Kong. Tomas mausab kaha ang kamada sa Cebu City south?
* * *
Dili na kapugngan ang Junjun Davide-Agnes Magpale tandem sa Sugbo niining umaabut nga eleksiyon. Giangkon ni Magpale nga nagpadayon na ang negosasyon tali sa Liberal Party ug sa iyang Bakud Party alang sa paglig-on sa maong ticket.
Ambut og unsa ang gibati karon ni Gob. Gwen Garcia niining maong kalambuan apan ako nasayud nga hulga kini sa paninguha nga padaganon ang iyang anak nga si Kristina, sa pagka-gobernador.
Kahinumduman nga ang nakapadaug kang Gob. Gwen niadtong miaging piniliay mao ang kinto distrito tungod sa paninguha sa Bakud Party.
* * *
Email: mannyrabacal@yahoo.com