Usa niana ka buntag samtang nangyunap sa akong hunahuna ug kasingkasing ang dili tiaw nga kasuko ug alburoto si T Lot2x didto sa Davao City (Anak kini siya ni Lola Fausta ang igsuon sa akong Lola Delfina) ang ni text kanako ning mosunod: Healthy Heart. Heal Thy Heart! Allow God to Heal our hearts from wounds, pains, and grudges and we will be healthy. Husto pud siya apan niadto gyung buntaga nagsugod og kaguba ang akong adlaw.
Ang kasingkasing mao ang sentro sa usa ka tawo. Mahinungdanon usab siya maingon nga mahinungdanon ang atong hunahuna. Kay adunay mga tanghaga nga bugtong kasingkasing lamang ang makatugkad. Ug kun unsa gani ang anaa sa atong kasingkasing mao usab kini ang kasagarang unod sa atong mga pulong ug mga prayoridad sa kinabuhi.Dili ka makapaabot nga ang usa ka kasingkasing nga puno sa gugma ang maghisgot matag karon ug unya sa mga butang nga puno sa kasuko ni makapaabot ka nga ang kasingkasing nga masuk-anon sa kanunay ang maghisgot og mga butang mahigugmaon.
Mao nga motuo gyud ko nga dili tanang sakit ato lamang tan-awon ingon nga lawasnon ra kaayo og sinugdanan. Dunay mga sakit nga nagagikan sa Siko-Emosyonal o dili ba kaha Espiritwal nga kahimtang. Atimanon gyud nato ang atong mga kasingkasing ato kining pagalimpiyohan gikan sa mga wala’y hinungdang mga pagbati...heal thy heart! Healthy heart!