Gipamatud-an nga ang giingon sa kagamhanan sa ilang kampanya sa tukmang paghipos sa basura nga adunay sukli nga kuwarta sa basura pinaagi sa pagbahig sa magamit ug dili na magamit o sa malata ug dili malata nga matang sa mga basura.
Ang madunot nga basura sama sa biya nga mga utanon, sagbot ug uban pa mahimo nga abuno ug ang dili madunot sama sa plastic mga lata, botelya ug uban pa. Ang mahimong abuno gikan sa malata nga basura mahimong makuwarta pinaagi sa pagbaligya ngadto sa mga mag-uuma ug ang dili na malata nga mahimong gamiton og balik adto usab ibaligya sa mga junk shop nga motimbang niini.
Apan dili lamang diay kutob ang giingon nga adunay kuwarta ang basura sanglit may mga higayon man nga ang tag-iya sa basura makalimot man sa pagsulod sa ilang kuwarta o mga alahas nga makaplagan usab sa tigpanguha og mga basura.
Dili ikalimod nga ang si bisan kinsa nga makasinati sa maong hitabo dili gayod tuyoon nga magkapakapa sa kalipay ang tawo nga hingtungdan kay tiaw mo ba nga dili lamang damhon nga mahimo na kining adunahan.
Sa adlaw nga nahitabo nga nakuykoyan sa mga tigkuha og basura sa mga basura sa dumping area sa dump site sa barangay Umapad posible nga wala makatulog sa kahinangop ug kalibog sa mga tawo nga hingtungdan sanglit kalit man kaayo ang ilang pagkakuwartahan ug nakapalibog kanila kun unsaon paggasto ang salapi nga pinaspasan.
Ug gumikan tingali sa naghinubrang kahinangop ug kalibog kun unsaon paggasto ang salapi nga mahalin gikan sa nakuykoyan nilang mga alahas nga bulawan maoy hinungdan nga nagpataka na lamang og gasto ug nanghatag pa og barato ngadto sa ilang mga silingan nga maoy hinungdan nga nabutyag ngadto sa kapolisan nga miresulta sa pagbawi sa maong mahalon nga mga butang.
Sa gihimo sa mga nakakaplag sa maong mga alahas daw matataw kaayo nga wala sila magtinguha sa pagtago kun nagtuo gayod sila nga ang maong mga alahas nga gilabay tipon sa mga basura wala na kinahanglana sa hingtungdan nga tag-iya. Nataligam-an lamang usab nila ang paghunahuna nga ang ingon niadto nga matang sa basura nga ilang nakaplagan dili gayod kasarangan ug mahinungdanon gayod unta nga ikataho ngadto sa mga awtoridad sa pagsuta niini.