Mga matang maigmaton

Daghang gamit ang mata sa tawo. Mahimong gamiton kini sa minaayo apan mahimong gamiton usab sa dinautan. Ang dinautang paggamit nagasukad sa usa ka sayop nga panlantaw nga maoy mopahimugso sa usa ka dili makiangayong paghukom ngadto sa uban. Ang mga mata nga gamiton unta alang sa pagpanginlabot ang gigamit naman hinuon sa pagpanghilabot. Bisan asa anaa gyud ni siya. Gani, mismo ang mga giisip nga BEATA sa parokya ang makahimo man sa ingon dili ba?

Ang mata salamin sa kalag. Diha sa Exorcism Rite, kun ang Alien Entity dili mo-identify sa iyang kaugalingon, himuong gamiton ingon nga kahimanan ang mga mata. Ang Exorcist ang mohimo og usa ka mapalandungong pagsud-ong sa mga mata sa medium. Kini usab ang mopatataw kun unsang matanga sa tawo ang imong gikaatubang. Hinuon, matawag ning usa ka partial interpretation sa personalidad sa tawo apan duna gihapon kini ikatabang.

Alang kanako, kun wala’y dautang binuhatan nganong mahadlok ka man? Bisan pa og ang mga himantayon magpalibot kanimo ug magbula ang ilang mga baba sa pagpanglibak, dili ka angay nga malisang. Tuyhad ang imong linaktan sanglit duna kay pagsalig sa imong kaugalingon.

Ayaw pag-agad sa mga impresyon sa mga tawo. Agda ang imong kaugalingon. Ayaw himoang sanapan ka sa kahadlok nga isalikway sa mga tawo gumikan sa mga dili maong panlantaw diha kanimo. Ang mahinungdanon gamita ang imong mga mata aron mogana ang imong utok sa pagpamalandong sa angayang buhaton ug mopitik ang imong kasingkasing sa angayang pagbati.