Sa 175 ka pesos

Si Eyay dunay anak nga namatay. Nagkinahanglan siya og 175 ka pesos aron malukat niya ang death certificate niini. Mao nga niadto siya sa iyang ig-agaw nga si Allen aron mohulam og 175 ka pesos. Unya sa dihang iya kining giduol igo lang siyang gikwentahan kun unsa kadako ang bayranan niini sa ilang abang sa tindahan nga ilang gigamit. Wala’y 175 ka pesos. Igo lang siyang mipatulo sa iyang mga luha nga molugmaw lamang panahon sa iyang kahubog.

Daghan sa mga tawo ang nahimong dili makadiretso og hatag og bisan unsang tubag gumikan sa duha ka mga hinungdan. Una, wala’y ikahatag. Ikaduha, dili ganahan mohatag. Mao nga mangita na lang gyud og pamaagi aron ma-justify ang pagbalibad ginamit ang litaniya sa mga nagkadaiyang mga pagpasabot. Dili sila makahimo og tubag sa :Oo o dili. Mas maayo pa nga prangkahan na lang aron dili na maglaum ang tawo.

Daghan nato ang mga dili tinuod. Daghan nato ang maglisud pagdawat sa matuod. Daghan nato ang dili mosubay sa matuod. Ang 175 ka pesos nga hangyo maoy sanglitanan sa mga tawong dili maantigong moangkon sa ilang kasinatian sa kalisud ug kakabos nga tungod niini ang adunay “anaa” gyud unta ang maantigo untang mopaambit. Ang wala’y iya ang maantigong modawat nga dili sa tanang higayon ang usa ka hangyo atong madawat. Si Allen buot mopakita nga kontrolado niya ang sitwasyon. Si Eyay ang nakasinati og kapildihan gikan sa maong hangyo niya nga gibalibaran agi’g depensa ni Allen sa iyang kinaugalingong kabubut-on nga dili gyud siya mohatag. Sama sila sa mga artista nga nihimo og usa ka drama sa gahum ug kadaugan.