Pit Senyor!

Kining mga fundamentalist ug so-called Born Again Christians ug uban pang mga sakop sa dili-Katolikong sekta, ganahan gayod mobiay-biay sa mga Katolikong deboto ni Sr. Sto. Niño.

* * *

Makasasa kuno ang mga Katoliko kay nag-ampo sa Sto. Niño nga usa lang ka imahen. Matud pa sa usa ka mamaligyaay og kandila diha sa Basilica, minilyon diay nga Katoliko ang maghuot sa impiyerno, kay grabe mang daghana sa mga Katoliko sa tibuok kalibutan.

* * *

Higala kong maestra nga usa ka Protestante wala maka-uyon niining pagyagayaga sa mga dili Katoliko sa mga nag-ampo sa Sto. Niño. “Masig sunod ra unta kita sa atong tinuohan,” matud niya. “Dili lang ta manghilabot sa tinuohan sa uban.”

* * *

Naa koy kaila nga mangyam-id kun mohisgot ko sa kadaghan sa manguyog sa Pista Senyor prosisyon matag tuig. Dili siya motingog mangyam-id lang. Body language lang iyang itubag.

* * *

Naa say dako-dako sa usa ka relihiyosong pundok nga nagbasi sa Mindanao kinsa mokatawa kong naay mohisgot sa Sto. Niño nga gimahal sa mga Sugbuanon. Ang iya ra gyung ikasulti ... “Ah, graven image.”

* * *

Naay usa ka non-Catholic nga proud kaayo sa gidaghanon sa rebolto sa mga santos lakip na ang Sto. Nino nga iyang napamuak. Mga pila na kaha ka rebolto sa santos ang imong napamuak?” gipangutana siya. Ang iyang tubag: “Di ko na maihap.”

* * *

Kini siya nasagpaan baya ni sa iyang silingan kang kansang imahen sa Sto. Niño giapil niini sa pagpamuak.

* * *

TRIVIA -- Malipayong Pista Senyor sa atong mga bumabasa diha sa Pasil. Pit Senyor! (With JVJ)