EDITORYAL - Ang pagpatay sa mga journalist

Bag-o pang nagsugod ang tuig 2012, usa dayon ka sakop sa media organization sa Mindanao ang gipatay.

Suma sa record, may 150 na ka mga sakop sa media sa tibuok nasud ang gipatay sa kasagarang kriminal nga wala hiilhi sukad sa tuig l986 hangtod niining tuig 2012.

Kasagaran niini gipatay pinaagi sa pagpusil nga nagpakita nga diha sa hilabihang kapungot ang mihimo sa krimen.

Dinhi sa Sugbo, ang dili makalimtang mga miyembro sa media nga gipatay pinaagi sa pusil, mao si Nabing Velez, Vic Villordon, ug si Iyas (ngalan nakalimtan).

Hinuon may taga media nga gipatay tungod sa personal nga atraso nga way labot sa iyang trabaho.

Ang ubang atraso mao ang bahin sa yuta, babaye, kainit sa ulo ug uban pang problema nga personal sa usa ka miyembro sa media.

Sa mga komentarista sa radyo di kalikayang may masakitan sa komentaryo ilabi na kun ilamba pag-ayo sa komentarista ang pagkatawo sa iyang komentaryohan tungod kay magsalig nga ang bugtong niyang kaatubang mao ra ang micropono sulod sa accouncer’s booth.

Susama ra usab niini ang mga kolumnista sa pamantalaan kansang kaatubang kun magsuwat sa iyang komentaryo batok sa usa ka tawo , ang iya rang makinilya kaniadto, apan computer na sa pagkakaron.

May tawo nga madutlan na gani sa komentaryo sa usa ka komentarista, makahunahuna sa pagkiha , apan kun usahay di na makapugong sa kaugalingon mohukom sa pagpatay sa komentarista.

Ang pagkondina kanila sayon raman kaayong estoryahon, apan baya sa imong bahin kun ikaw ang hingtungdan, bisan unsa nimo ka kawatan ug tulisan nga tinuod unya ibulgar ang imong kadautan sa radyo o kaha pamantalaan, malipay ka ba?

Busa di hulga sa mga kalmadong sakop sa media ang gitawag nga “journalist killing”, gawas sa 33 ka mga miyembro sa media nga napagan lang sa bangi sa mga politiko didto sa Maguindanao niadtong tuig 2009. Di ba?