Ang pagmaya sa Bag-ong Tuig

Bag-ong tuig  na usab ug angay nato kining sugaton sa pagmaya kay nakalatas kita sa laing tuig sa atong kinabuhi.

Luyo sa nagkalainlaing katalagman nga mihugpa sa nasud sa tuig 2011, atong atubangon nga puno sa kaisog sa pagpakigbugno sa mga nagkalain-lain na usab nga mga kasakit ug hulga sa kinabuhi ug panginabuhi kining bag-ong tuig sa atong kinabuhi.

Wa nay labot niini ang mga mitaliwan na gumikan sa natural nga kamatayon, aksidente ug ang mga napagan sa mga natural ug mugna sa tawo nga katalagman ug sa mga panggubatan.

Kitang buhi nga mopadayon sa atong mga damgo ug plano maoy moatubang na usab sa atong kapalaran niining tuiga.

Ang mga politiko maayo kaayo mohimo og palihi inig sugat sa bag-ong tuig kay wa silay   laing gilantaw gawas sa paghimo og mga estratihiya aron debuenason sa ilang karera.

Samtang anaa sa ilang hunahuna ang paghatag og maayong serbisyo sa katawhan, magpasulabi usahay sa ilang galamhan ang kabalaka nga basin biyaan sila sa ilang mga supporter ug   makapawani na hinuon kanila sa umaabot nga election. 

Sa politika nagkadaiya ang gimmick nga pasiugdahan sa mga politiko aron mopilit kanila ang ilang mga lumalaban, ug usa niini mao ang kuwarta nga ilang ihungit ngadto sa mga botante.

Sa bahin sa mga negosyante, usa usab sila sa kusog kaayo mohimo og palihi   sa pagsugat sa bag-ong tuig, sa tuyo gihapon nga ang tibuok tuig, debuenas alang sa ilang mga negosyo.

Daghan kaayong mga yanong   tawo nga mosagop kunohay sa palihi ug makita nato nga kasagaran kanila mamalit og lingin nga mga butang , mga senina nga binuwakan og lingin, mga prutas nga lingin   ug uban pang lingin kay kuno simbolo kini sa kuwarta nga lingin.

Apan wa nila hisayri nga ang labing dako nga kuwartang lingin karon P10 ra gyud kay ang mga linibong kuwarta kuwadrado may porma. Di ba?