Kitang tanan nangita og kalipay dili ba? Apan ang pangutana: “Unsay makalipay nato? Nakaplagan na ba nato kini? O ang kalipay duna bay kinutoban? Si Abraham Lincoln nagkanayon: “Most people are about as happy as they make up their minds to be.” Kini nagpasabot nga ang kalipay dili lang moabot kundili usa ka pagpili, usa ka conscious decision sa usa ka tawo alang sa iyang kaugalingon. Ang kalipay mahimong lumalabay o malungtaron. Lumalabay kun sa usa ka higayon, ang tawo makatagamtam sa daklit nga kalipay gumikan sa pagdaug sa usa ka sugal o pagsinati sa usa ka pabor. Malungtaron kun ang maong tawo nakasinati sa malinawon ug matagbawon nga kinabuhi nga iyang gipili. Sama pananglit sa usa ka magtutudlo nga bisan pa sa kagamay sa sweldo ug kalisud sa dapit diin siya nadestino ang mobati og katagbawan ug kalipay sa iyang inadlaw-adlaw nga buluhaton.
Asa man ang kalipay? Kini mahimong atong masinati ning mosunod: GUGMA - Diin gihimo nimong inspirasyon ang tawo, buhat, o kawsa. KAHIMSOG - Diin ang pagpakita sa gugma sa imong kaugalingon mao ang pag-atiman usab niini aron magpabiling himsog ug lig-on. Ang kahimsog dili lang sa lawas kundili usab sa hunahuna, kasingkasing, ug kalag. MATERYAL NGA KATIGAYONAN - Diin matubag ang mga nag-una nimong panginahanglang materyal (pagkaon, saput, balay, edukasyon). PROPESYON - Diin ikaw nakapaambit sa imong nakat-onan ngadto sa kinabag-an. Dili lang tungod kay nagkinahanglan ka og sweldo kundili tungod kay kini pagpadayag sa imong pagkatawo usab.