Luwas nga pagsugat sa 2012

Karong adlawa ang labing ulahing adlaw sa tuig 2011 ug sugaton na nato karong gabii ang pag-abot sa 2012. Daghan na kanato ang nangandam pagsugat sa Bag-ong Tuig nga sadya uban sa atong mga kabanay. Kun nakabantay mo dali ra gyud kaayo ang pagdagan sa panahon.Wala lang nato damha laing tuig na man pud diay ang atong maabtan. Manghinaut lang kita nga magmabungahon ang umaabot nga Bag-ong Tuig kanatong tanan.

Labaw sa tanan manghinaut kita nga dili intawon mahitabo kadtong salida nga 2012. Bitaw komedya ra. Dili na ikalalis nga murag may pagkabati ang atong kasinatian sa 2011 sanglit daghang mga kalamidad ang miigo sa atong nasud sama sa pagbaha didto sa Iligan, Cagayan de Oro ug sa Negros Oriental nga pwerte intawon kadaghang kinabuhi ang nakalas.

Daghan usab ang insidente sa sunog nga nakapaugdaw sa atong mga kabtangan ug duna usab daghang nakalas. Gani sa ulahing bahin sa Disyembre 2011 usa ka dakong sunog ang miigo sa Gaisano Capital nga nailhan natong mga Sugboanon nga Gaisano South nga nakapaluya intawon sa mga kawani niini kay lagi mag Bag-ong Tuig man unta apan nawagtangan sila og panginabuhian.

 Siguro mao kadto ang labing dakong sunog nga miigo sa Sugbo ilabi na kun atong tan-awon ang kinatibuk-ang epekto nga namugna sa maong sunog gikan sa ekonomiya ug sa kadaghang nawagtangan sa trabaho ug negosyo.

Hinuon nagsige paman og imbestigar ang mga sakop sa kabomberohan sa hinungdan sa maong dakong sunog. Huwaton lang nato ang resulta sa gipahigayon nga imbestigasyon ug dili unta kita magpadala sa mga estorya-estorya nga atong madungog nga maoy makapalawgaw sa nagpadayon nga pakisusi.

 Ang maong dakong sunog usab nakapakita sa publiko sa kun unsa ka kuwang sa kahimanan sa atong kabomberohan.Tinuod dili magpaulahi ang inyong kabomberohan sa kahanas niini sa pakigkombati sa sunog apan mag-unsa man ang pagkamaayong laki niini sa fire operation kun ang mga kahimanan nga gipanggamit daling motiurok.

Hinaut nga sa Bag-ong Tuig dunay kabaghoan nga mahitabo sa BFP pinaagi sa pagdugang og mga kahimanan sama sa brand new fire trucks, aerial ladders, SCBA ug uban pang mga gamit.

Sa kataposan, among gihangyo ang publiko sa paglikay sa paggamit sa mga firecrackers karong gabii kay lagi delikado kini. Sa makadaghang panahon nagbalik balik nalang ang mga ahensiya sa gobiyerno sa pagpahimangno nga unta likayan nato ang paggamit niini kay daghan na ang nabiktima dunay naputlag kuyamoy, nabuta ang uban ug naugdaw ang mga panimalay ug mga kabtangan.

Dili nato buot nga moistar kita sa ospital sa unang adlaw sa 2012 ug labaw sa tanan dili kita gusto mopuyo sa mga evacuation centers sa Bag-ong Tuig kay naugdaw atong panimalay gumikan sa pagpabuto sa mga firecrackers.

Sa ngalan sa mga kadagkoan sa Bureau of Fire Protection region 7 nga gipangulohan sa among abtik nga Regional Director SR. SUPT. MA. LUISA C. HADJULA, Happy New Year kaninyong tanan!