Karong gabii mao na ang katapusang mga gutlo sa tuig 2011 ug mosugat na usab kita sa Bag-ong Tuig 2012.
Ang tuig 2011 maoy tuig nga gitawag tuig sa mga katalagman, diin ang linog, tsunami, lunop, baha, kagutom, gubat nasud batok nasud ug kagubot sa nagkalainlaing dapit sa kalibotan maoy nasugamakan sa mga tawo sa yuta.
Dinhi sa atong nasud, nasaksihan ang maong mga katalagman, ug hinuon di kaayo daghan ang nakalas sa gubat sa mga sundawo batok rebelde, apan sa gubat sa mga politiko, usa sa labing inila sa nasud ang nabilanggo, samtang nag-ung-ong usab sa impeachment ang laing inila sa natad sa hudikatura.
Ang linog, wa kaayo makahatag og dagkong kadaot lahi sa mga bagyo, baha ug panahili sa yuta.
Sa natad sa mga nadaot gumikan sa pabuto wa pa hisayri kun pilay makuhaan og mga tudlo o kaha maputlan og tibuok kamot o bukton ug karong gabii hangtod ugma sa unang mga takna sa tuig 2012 anha pa nato hisayri.
Apan sama sa miaging pasko gipangandaman pag-ayo sa Department of Health ang maong mga panghitabo pinaagi sa pagmandar sa tanang mga hospital nga atimanon dayon ang mga angol gumikan sa pabuto.
Di mahimong kalimtan sa mga Filipino ang kultura nga inig sugat sa Bag-ong Tuig kinahanglang kutob sa mahimo paulbuhon sa pabuto ang palibot aron mosugat sa Bag-ong Tuig nga puno sa ka-debuenas ang kinabuhi.
Pinaagi niini di mawad-an og kuwarta ang mga pabrika sa pabuto ug mga negosyante niini, ug labaw sa tanan ang mamalit sa pabuto labing kuwartahan tungod kay aduna may ikapalit.
Busa biyaan nato ang tuig 2011 uban sa mga halandumong kalipay ug kasub-anan ug sugaton nato ang Bag-ong Tuig pinaagi sa pag-ingon ..Mabuhi ug Bulahang Bag-ong Tuig 2012.