Adunay pagduda nga gituyo pagsunog ang Gaisano South Capital aron makobra nila ang insurance kay anaa silay gitukod nga bag-ong tindahan dinhi sa siyudad.
Akong kaila ang tanang mga Gaisano nga nagdala sa mga supermarkets ug malls dinhi sa Sugbo nga sila si Joseph, Edward, Alix, Benito ug si Eddie. Dili hinoon nako mga higala ang ilang mga anak nga mao nay nagdala sa ubang mga Gaisano stores.
Grabe ang ilang kompetensiya sa negosyo bisan sila mga ig-agaw. Natay-ug gani ang ilang monopoliya sa retail business dinhi sa Sugbo sa dihang nisulod ang SM City mall.
Wala hinoon ako magduda sa pagkasunog sa maong tindahan. Nahitabo kini niining panahon sa Pasko nga kusog kaayo ang ilang negosyo. Kining Gaisano South Capital sa eskina sa mga dalan Colon ug Leon Kilat mao usab ang flagship sa hapit 20 ka mga tindahan ni Eddie Gaisano.
* * *
Duha ka katulog nalang 2012 na. Samtang nagkalainlain ang panagna sa mahimong kahimtang sa ekonomiya ug kun unsa ang panghitabo sa atong nasud sa Bag-ong Tuig ako nagtoo nga ang karaang mga problema mao ra gihapon ang maghamok sa atong nangagamhanan sa nasud.
Ako nagtoo nga dili gayud mohunong sa pagpangurakot ang mga balhiboon og kamot nga mga politiko ug ubang taga-gobiyerno pinaagi sa overpricing ug kickback sa mga proyekto sa gobiyerno. Mao kini hinungdan nganong substandard ang atong mga infrastructure projects.
Magpadayon ang mga politiko sa pagamit sa mga kabus aron sila magpadayon sa gahum aron tuloy ang ligaya. Mas mograbe ang iligal nga sugal ingon man ang smuggling sa 2012 kay nagkinahanglan man sila og campaign funds ug minilyon usab nga ilang itagana kun mapildi sila sa eleksiyon sa 2013.
Dili gihapon mahunong ang pagpamutol sa kakahuyan sa mga hakog nga loggers nga maoy naka-ingon sa grabeng baha sa Cagayan de Oro, Iligan ug sa ubang mga dapit sa nasud.
Akong gipaabot nga magpadayon ang panagbangi sa mga dagkung haligi sa atong gobiyerno. Magsugod na ang impeachment trial ni Supreme Court Chief Justice Renato Corona nga mobahin sa baruganan sa mga Pilipino. Mag-unay gihapon ang atong kaigsoonan nga sundawo batok mga rebeldeng komunista ug muslim.
Ang labing kahadlokan mao ang hulga sa Pilipinas gikan sa China ug sa ubang mga claimants sa Spratly islands nga gituhuang mograbe sa 2012.
* * *
Karong gabii moabot na gikan sa Chicago ang kinamanghuran sa tulo nako ka anak nga si Jade uban sa iyang husband nga si Miah Pasculado. Ugma moanhi usab sa Sugbo ang akong kinamaguwangang anak nga si Marjorie (ang iyang kaluha nga lalaki nga si Manjo dia sa Cebu uban kanako) ug ang iyang bana nga si Dennis Magadia uban sa ilang duha ka anak nga si Poco ug Kodi. Sugaton sila sa ilang inahan (lola) nga si Josephine aron pagsaulog sa akong birth anniversary karong Enero 1.
* * *
Hinaut pa'ng dili magpaboto sa mga gidili nga libentador ang atong mga kaigsoonan agi’g pagsugat sa Bag-ong Tuig aron malikayan ang disgrasya.
Ako hinoon dili gayud magpaboto og libentador bisan unsa ka gamay hinuno-a malingaw ako sa pagbulhot sa torotot ug sa pagtambol aron pagsabasaba. Gawas nga minus ang gasto niini dili pa kuyaw sa disgrasya.
Hinaut pang matinood ang atong pangandoy nga prosperous new year inay dangerous new year.
* * *
Email: mannyrabacal@yahoo.com