MGA LAMAS SA KINABUHI
Pagpamalandong alang sa Malangkubong Kaayohan
Kagahapon sa kaadlawon, nahimong sentro sa pagbasa sa Ebanghelyo ang pagduaw ni Maria ngadto sa iyang talianak ug edarang ig-agaw nga si Isabel. Pagkadungog gyud ni Isabel sa pangumosta ni Maria niulpot sa kalipay ang bata nga iyang gisabak. Ngano man? Kini tungod sa mga mosunod nga rason:1.) Panahon. Nga bisan sa kalayo sa panaw nga mokabat og balig tulo ngadto sa upat ka adlaw si Maria ang nigahin gyud sa iyang pagsakripisyo ug panahon aron atimanon ug himamaton ang iyang ig-agaw.
2.) Maayong Balita. Nag-inambitay sila sa mga katingalahan apan malipayong panghitabo sa ilang kinabuhi. Ang Dios naghatag kanila sa pribelihiyo nga mamahimong mga inahan sa mga mahinungdanong personahe sa sugilanon sa kaluwasan.
3.) Pagtuo. Nga bisan sa ilang kaubos ang Dios ang motuman gyud sa iyang panaad ngadto sa katawhan pinaagi kanila. Kang Isabel alang kang Juan nga mao ang precursor ug kang Maria alang kang Jesus nga Mesiyas.
Ingon ini usab ang pakiglambigit ug ang liyok sa kinabuhi. Ang tawhanong kahingpitan ang magasukad gayud diha sa paggahin og panahon, maayong balita, ug pagtuo niadtong mga tawo nga nalambigit kanato. Si Nicholas Sparks ang nagpahinumdom kanato ning mosunod: “All relationships have one law: Never make the one you love feel along especially when you’re there.” Ang tinud-anay nga panagkuyog nagasukad gyud sa tinguha nga mamahimong bililhon ang matag gutlo sa panagkuyog. Kini ang diwa sa Pasko. Ang Dios nakigkuyog gyud kanato.