Ang kagatusan ka kinabuhi nga nakalas gumikan sa bagyong Sendong nga mikusokuso pag-ayo sa Cagayan de Oro City di usa ka bag-ong butang.
Murag nabag-ohan lang ang tawo tungod kay panagsa ra mang mahitabo ang maong susamang katalagman nga mosingil og kagatosan o kaha kaliboan ka kinabuhi.
Kamatuoran nga lisud kaayong likayan sa tawo, usa ka talan-awon nga kun analisahon pag-ayo sa tawo , di diay lalim kun ang Dios na maoy masuko kay walay makapugong Kaniya.
Mga panghitabo nga wala dahoma sa tawo tungod kay wa mahasulat sa Biblia nga sa maong adlaw ug oras may moabot nga katalagman sa Cagayan de Oro nga mokalas og kagatosan ka kinabuhi.
Mao man gani nga kun hunahunaon pag-ayo sa tawo, ang mga butang nga nahitabo karon bunga sa kasuko sa Dios, nahimo man gani bisan wala mahasulat sa Balaang Kasulatan, daw unsa pa kaha ang mga butang nga napatik sa maong basahon nga gipamulong na mismo sa Dios.
Pag-abot sa adlaw sa paghukom sumala sa Dios, ang tanang nangamatay nga anaa sa lubnganan sa yuta ug kadtong wa malubong tungod kay missing ug wa na igkita sa kadagatan o kaha bisan asang dapita sa kalibotan, di angay kabalak-an kay matud pa ang dagat mohatag sa iyang minatay, sama sa yuta nga mohatag usab sa iyang minatay aron hatagan pagbalik og lawas ug gininhawa sa Dios.
Ug ang maong bag-ong kinabuhi, duha ra gihapon ang padulngan nga mao ang langit alang sa mga tawong tarong ug impiyerno alang sa mga tawong wa makaila sa matuod nga Dios.
Kun di kalikayan sa tawo ang kamatayon dinhi sa yuta, labaw nga di siya makalikay sa silot nga walay katapusan pag-abot sa panahon kun ning panahon sa iyang pagpakabuhi nakalimtan niya nga may angay siyang alagaron ug simbahon nga mao ang matuod nga Dios nga naglalang kaniya.
Sa mga nangamatay sa baha sa Cagayan de Oro kun may mga anak man ang Dios nga napagan sa maong katalagman, sumala sa Biblia sa pagbalik ni Kristo mobangon ra sila aron mosugat kang Kristo, apan kadtong wa mag-alagad sa Dios, sumala sa Biblia magpaabot pa sila sa panahon nga buhion sila pag-usab aron silotan sa kayo nga way pagkapawong. Di ba?