Pagsabungan naka-kuwarta na sa iyang basura

Sulod sa dugay’ng panahon ang basura nahimo nga numero unong suliran alang sa barangay Pagsabungan, Mandaue City.

Apan sa pagkakaron ang basura dili na suliran alang sa barangay Pagsabungan kun dili kaabag na ug kaalyado sa ekonomikanhong kalamboan sa maong barangay.

Kay pinaagi sa tabang ni Mandaue City Mayor Jonas Cortes nga mihatag og P100,000 alang sa pagbutang og Material Recovery Facility (MRF) sa 27 ka mga barangay ang duha ka mga barangay sa Mandaue City nga mao ang Canduman ug Pagsabungan naka-kuwarta na sa ilang basura.

Kay ang basura nga malata galingon man sa MRF samtang ang dili malata apan recyclable ug residual waste mahimo man nga ilabay ngadto sa Umapad Dumpsite.

Suma pa ni Pagsabungan barangay captain Andres C. Suson nga daghan na siya og suki alang sa iyang mga fertilizer nga gikan sa basura.

“Manghinaut ako nga ang among success story sa basura sundogon sab sa ubang balangay sa Mandaue City,” suma pa ni Suson. Ang success story ni Suson mahitungod sa iyang proyekto sa basura maoy usa sa mga hinungdan nga gipasidunggan siya isip “Most Outstanding Barangay Captain of Mandaue City” sulod sa duha ka nagsunodsunod nga mga tuig.

Ang labing dakong katarungan kun ngano nga gipasidunggan si Suson mao ang iyang daghang mga proyekto nga iyang gipabuhagay atol sa iyang termino. Sama sa water and drainage system, pag-aspalto ug pagsemento sa kadalanan sa iyang barangay, pagbutang og mga classroom buildings ug uban pa.