Aksyon na uy!

Bisan og wala kita makadungog nga naghimo og krimen kining mga batan-on nga sagad “armado” og mga binuhat nga drums ug manaygon sa mga PUJ’s, apan angay gayud nga sila hugtan sa paghimo’g kampanya. Hinoon dili man kaayo ko tigsakay og PUJ kay mag-agwanta ra man intawon ko pagsakay og motorsiklo, apan usahay makadungog ko nga saba kaayo kining mga batan-on nga magkabiba anang ilang mga improvised drums.

Nakabantay ko nga bisan og dili Pasko anaa kining maong mga talan-awon sa karsada. Nagtoo tingali kining maong mga batan-on, ilabi na kining mga Badjao, nga nindot pamation kining ilang tugtog.

Awhagon nako ang mga tigpatuman sa balaud nga hingusgan nila paghimo’g kampanya kining maong mga manaygonay diha sa mga PUJ. Gasamok-samok ra kining mga tawhana.

Usa ka drayber misaysay nako nga nadakpan g’yud siya kay namungingi man sa mga tawo nga nangumbayot sa iyang gimaneho nga PUJ. Ang maong mga tawo mga manaygonay.

* * *

Bawion diay kuno sa kanhi tag-iya sa Citicenter Commercial Complex ang ilang property diha sa barangay Kamagayan nga gisakmit na sa kagamhanan sa dakbayan sa Sugbo tungod sa kapakyas nila pagbayad og buhis sa taud-taud nga panahon. Gibasa nako ang suwat ni Mr. Bal Falcone, ang miangkong usa sa mga tag-iya kaniadto sa Citicenter, nga mipasabot nganong wala sila mobayad og buhis nga misangpot sa pagsubasta sa ilang property. Tan-aw nako mora’g dili madawat ang argumento ni Mr. Falcone nga mihulagway nga illegal ang pag-angkon sa dakbayan sa ilang property nga karon kuno nagkantidad na og P300 milyones.

Ang iyang argumento nga gipagamit nila ang mga opisyal sa Kamagayan ang kabahin sa ilang “covered market” nga magamit sa barangay hall nga walay bayad, unya dunay kabahin sa ilang property nga gigamit isip playground, mao nga dili sila mobayad og buhis, mora’g dili maayo.

Wala niya iklaro kun may kasabotan ba sila niini sa mga opisyal sa dakbayan nga aprobado sa konseho. Kun adto ra sila makigsabot sa mga opisyal sa barangay mora’g dili mao.

Ang pagkolekta sa real property tax iya kini sa kagamhanan sa dakbayan ug ang barangay igo lang makadawat og bahin. Kun kini maoy ilang intensyon gihimoan g’yud unta nila og kasuwatan.

Aw hinoon, ang suwat ni Mr. Falcone giendosar man kini ngadto sa City Legal Office aron kahimoan og dugang pagtoon. Pero tan-aw nako tungason kaayo ang pagkab-ot nila og kadaugan sa tinguha nga bawion ang ilang property nga karon ang titulo ubos na sa City of Cebu.

* * *

Ang tag-iya sa usa ka kan-anan nga migamit sa aseras diha sa eskena Bonifacio ug Sikatuna mipadala nako og suwat. Naghangyo nga kaluy-on unta siya kay duna siya’y gipaeskwela.

Ambot unsa kaha’y buot ipasabot ni Mr. Romeo Sintos nga tugotan lang siya nga gamiton sa negosyo ang aseras unya isakripisyo ang kinabuhi sa mga tawo nga anha na moagi sa karsada?

Unya, unsa man usa’y gihimo sa mga sakop sa SPEED nga hangtud karon wala man sila’y aksyon niini? Magduda na g’yud ko da. Mora’g tinuod na g’yud ang akong nadunggan.

Kini si Noel Artes, amigo ko man g’yud ni, apan sigi lang og pasalig nga aksyonan dayon niya apan hangtud karon nagpabiling kyogpos ang iyang mga bukton.

Unya kun mokubra na sa iyang sweldo abtik pa’s langgam manatad.