Ang pagpa-impeach kang Chief Justice Renato Corona di usa ka pagdaugdaog kaniya kundi usa ka paagi aron kahatagan siya og higayon nga makapadayag sa iyang katarungan.
Di tungod kay siya’y huwes ug labaw’ng imbestigador ug maghuhukom sa labaw’ng hukmanan wa nay maka-imbistigar ug mo-huwes kaniya.
Ang mga magbabalaod sa nasud sama sa senado maoy gihatagan og katungod sa batakang balaod nga makaimbistigar sa mga labaw’ng opisyal sa kagamhanan sa Pilipinas.
Kun ang Pamuno nasud nga maoy silbing amahan sa nasud maimbistigar man gani, mao gihapon ang mga opisyal nga ubos sa iyang pag-atiman.
Daghan man gud ang naigking dihang nahukman sa mga magbabalaod nga ipa-impeach si Corona.
Apan di ta mahibung kay bisan ang mga magbabalaod mismo wa magkasinabot.
Busa ang maong mga magbabalaod mibotar og “no” dihang gipapili sila “yes” o “no” sa pagpa-impeach kang Corona, hinuon mayoridad ang mibotar og yes nga nagpasabot nga gusto silang makapangatarungan si chief justice.
Apan ang nakapait sa impeachment sama sa sistema karon kay masaksihan sa tibuok kalibotan, diin kun magkalisud-lisod na ang imbistigahunon makita sa tanan ang pagpanglipaghong sa dagway niini tungod sa kadaghang mga pangutana ang igaling kaniya.
Apan kun ligdong lang ang mga tubag sa imbistigahunon, aw basin mahutdan usab og pangutana ang mga imbistigador unya di makapiit kang Corona.
Hinuon ang malagmit makapabunga-bunga kang Corona sa pagtubag mao ang mga pangutana sa isyu bahin sa dinalian nilang pagpalarga kang kanhi presidente Arroyo ngadto sa gawas luyo sa kasayoran niya nga may nag-ung-ong nga mga kasong ipasaka sa nahauna ug sa ka-di grabing kahimtang sa lawas niini nga namatud-an dihang giusisa sa mga batid nga doktor nga nag-atiman kaniya. Di ba?