Manny Christmas!

Miresulta na gayod ang pagpanaway ni Pres. Aquino kang Supreme Court (SC) Chief Justice Renato Corona. Gi-impeach na sa mga kaalyado ni PNoy sa ubos balay-balauranan si Corona.

Samtang tulin pa sa alas-kwatro ang mga kongresista nga nakakuha og daghang pirma aron mapadangat dayon ngadto sa senado ang articles of impeachment apan dili masiguro kun unsa ang mahimong hukom sa mga senador kalabot niini.

Dili sayon ang pagkuha og 16 botos gikan sa 23 ka mga senador aron pagtangtang kang Corona sa katungdanan. Dili pa hinoon nato matugkad ang baruganan sa mga senador, labi na ang mga dili sakop sa Liberal Party, kalabot sa maong kaso.

Wala pay nahukmang sad-an sa tanan nga gi-impeach dinhi sa nasud. Ang kaso ni kanhi presidente Erap Estrada wala mahuman ug natabunan kini sa People Power. Ang uban wala gani makalusot sa ubos balay-balauranan samtang si kanhi Ombudsman Merceditas Gutierrez ni-resign sa wala pa maduso ang articles of impeachment ngadto sa senado.

Dili ako makasiguro kun mahuman ba ang pagdungog niining maong impeachment ug si kinsa ang mogulang mananaug, si Aquino ba o' si Corona? Ako sayud hinoon nga ang pildiro niini mao kitang mga Pinoy.

* * *

Dili ba gayud mahimong saulogon ang Pasko nga dili magpaboto sa gidili nga paboto? Bisan dili gayud ako gusto nga magpaboto ug libentador pagsugat sa Pasko ug Bag-ong Tuig apan uyon ako nga tugutan sa pagamit og libentador nga gitugutan sa balaud ang atong mga kaigsoonan.

Kining pagpaboto gisugdan sa mga Chinese aron pag-abog kuno sa mga dautang espiritu. Apan ang ubang klase sa pagsabasaba gigamit usab nila aron sumala pa molayas ang mga dautang espitiru ug magpabilin ang mga maayong espiritu inig sulod sa Bag-ong Tuig.

Akong girispituhan ang pagtoo sa atong mga kaigsoonan apan kinahanglang motuman kita sa balaud nga alang ra usab sa atong kaayuhan.

Kun sa dekada 60 natagbaw kami sa pagpaboto sa mga gagmay nga libentador nganong dili na man kini buhaton karon?

* * *

Anaay daghang debati kalabut sa pagkatawo ni Hesus sa Disyembre 25. Apan alang kanako ang mahinungdanon mao nga gitamod ug giselebrar sa katawhan ang pagkatawo sa atong manunubos ug dili na importante kun kanus-a gayud siya nahimugso.

Nindot kaayong hinumduman ang mga Pasko sa gamay pa kitang bata. Magpaabot kita sa kaadlawon tungod sa gitawag nga Simbang Gabi kay mamalit man og puto ug sikwate ang atong mga ginikanan inigpauli na nila human sa misa.

Nagtoo kita nga ang mga gasa nga gisulod sa medyas nga gibitay sa gawas sa atong balay hinatag gayud ni Santa Claus. Morag dili usab limtanon ang atong mga ninong ug ninang sa paghatud sa ilang pinaskuhan sa atong balay, dili sama karon nga morag aduna silay amnesia. Apan lahi na karon kay kita na usab ang adunay amnesia kay makalimot o tuyoon gayud pagkalimot ang paghatag og pinaskuhan sa atong mga kinugos ug linudhan sa kasal.

Samtang barato kaayo ang mga hamon, queso de bola, mansanas, kahil ug mga sagol sa fruit salad kaniadto taga-liog na ang presyo niini karon. Kaniadto ang among idalit mao ang tuba ug ubang mga baratohon nga ilimnong makahubog karon whisky, beer ug red wine na.

Samtang naandan nato nga maglingawlingaw panahon sa Pasko kinahanglang dili nato kalimtan nga ang labing importante niining adlawa mao ang pagkatawo sa atong manunubos. Kun wala pa matawo si Hesus ug nagpakamatay dinhi sa kalibutan dili unta kita masalbar sa atong pagka-Gentile.

* * *

Belated birthday greetings ngadto sa akong suod nga higala nga si Mrs. Lorenza Ford nga nagsaulog sa iyang birth anniversary niadtong Dec. 7, sa iyang luho kaayong hotel, ang Ford Inn. Si Mrs. Ford daghan na kaayong natabangan nga mga kabus apan dili siya sama sa uban nga magpagarbo dayon pinaagi sa radyo, TV ug newspapers sa ilang binuhatan. Keep up the good work, Mrs. Ford!

* * *

Magpasalamat ako nga makakita na og klaro niining pagsaulog sa Pasko. Dugay na nakong giantos ang pagkadili nako makakita sa tuo nakong mata tungod sa cataract. 

Sa pag-awhag sa akong anak nga si Jade ug sa suod nga higala ug sa ehemplo nila ni Atty. Amor Cañete ug Bert Reformina, nga bag-o usab nga nagpa-opera og cataract, nadani ako sa pagpakonsulta ug pagpa-opera sa usa ka inila ug batid sa doktor sa mata nga si Dr. Yong Larrazabal sa Cebu Doctors Hospital. Mao kini ang labing dakung gasa sa Pasko nga akong nadawat. Agi'g pasalamat gikan kanako, Manny Christmas!

Email: [email protected].