Si Don Vicente ug Don Paulino Gullas, Don Vicente Rama ug Don Sergio Osmeña gibugkos sa usa ka pilosopiya sa kaligdong mahitungod sa pangalagad sa katawhan ug kana wala’y lain kun dili ang katarong ug pagka-mapahiubsanon.
Ang upat pulos gayod naglikay kay dili mahilambigit sa isyu sa pangawkaw. Ang upat nabantog sab sa ilang ka kugi ug pagkamahiubsanon samtang nagserbisyo sa lungsod.
Ang upat nabantog sa ilang birtud sa delicadeza. Gani adunay nabaniog nga sugilanon nga sa diha nga mayor pa si Don Vicente Rama sa dakbayan sa Sugbo iya gayod nga gilikayan nga bisan ang iyang asawa dili makasakay sa iyang sakyanan nga gipagamit kaniya sa kagamhanan aron sa paglikay sa mga libak sa katawhan nga iya na nga gipahimuslan ang sakyanan sa gobiyerno.
Gumikan sa maayong record ni Gullas, Rama ug Osmeña humot gihapon ang ilang mga anak sa katawhan. Si Cong. Eduardo R. Gullas wala gihapoy pildi-pildi sa unang distrito sa lalawigan sa Sugbo. Si Mayor Michael L. Rama mao gihapon ang mayor sa dakbayan sa Sugbo. Samtang si Kongresista Tomas R. Osmeña wala pa sab mapildi og piniliay.
Ang mga anak o apo ni Gullas, Rama ug Osmeña humot gihapon sa katawhan tungod sa maayong record sa ilang amahan o apohan. Mao kana nga mag-amping gayod kita sa atong isigkatawo nga dili makahimo og eskandalo aron ang atong mga kaliwatan dili yam-iran ug biaybiayon ugma damlag.