Daghan ang buot mabuhi ug mas daghan gyud unta ang nagtinguha nga sa atong pagsulod sa kinabuhing tawhanon mamahimo unta kining mabulukon ug mabungahon. Mao nga mahinungdanon kaayo nga sa matag lihok nato sa usa ka butang atong pangutan-on ang atong kaugalingon ning mosunod:
1. “Unsay nagtukmod nako sa pagbuhat niini?”
2. “Nagmalipayon ba ako niini?”
Daghan nato ang nahimong mokatawa apan wala magpasabot nga nalipay. Daghan nato ang nisulod sa mga relasyon apan dili diay maantigong mohatag sa kinatibuk-an sa atong kaugalingon. Nahimong split ang atong paghatag sa atong panahon ug hunahuna. Ang resulta wala nato matugkad kun unsa diay kaanindot ang kasamtangang kalambigitan.
Sa akong personal nga panahom diha sa paghigugma pananglitan, mahinungdanon kaayo ang gugma beyond reasonable doubt sa matag usa aron bisan unsa pa kalayo ni bisan unsa pa ka komplikado ang tanan mamahimo kang makasinati sa presensiya sa imong hinigugma bisan pa man kun physically halayo siya.
Kay nahigugma ka man kaniya, kini magtukmod kanimo aron mas hatagan mo og halawom nga kahulogan ang matag gutlo diin kamo nagkukabildo o dili ba kaha nagbinayloay og text messages sa inyong cellphones. Nga bisan kun wala siya ikaw magpangita tungod kay ikaw nagmalipayon man uban kaniya. Dili laay ang inyong panagkuyog. Puno kini sa kahulogan. Puno kini sa kinabuhi.
Kita ang mopili sa atong kalipay. Kita ang molatid sa atong dalan sa panaw sa kinabuhi. Hibaw-i nga ang Dios dili usa ka diktador nga Dios. Mahigugmaon Siya nga tungod niini gitahod niya ang atong kagawasan. Ikaw unsa man ang nagtukmod nimo aron gamiton mo sa maayo o sa dautan ang imong kagawasan? Nagmalipayon ka ba?