Angay tang magpasalamat sa Dios

Ang Disyembre maoy katapusang buwan sa tuig, buwan sa pamalandong nga sa sulod sa 12 ka buwan sa atong pagpakabuhi milampos ta nga may kinabuhi sa pakigbugno nato ning kalibotan nga puno sa mga hagit,   pagsulay, kagubot, disgrasya matag karon ug unya ug nagkalainlaing suliran sa kinabuhi.

O tinuod gumikan sa kalipay nato nga nakaabot kita ning buwana, himoon ang tanan aron mohatag og mga gasa ngadto sa mga minahal sa kinabuhi, higala, mga kaila ug sa minahal sa kasingkasing.

Apan usahay ang tawo nga matugob sa kalipay ilabi na sa mga nakab-ot sa kalampusan sa edukasyon ug panginabuhi, makalimot na sa naghatag kaniya sa maong kalampusan.

Di lamang ang mga nagmalampuson sa edukasyon ug panginabuhi ang makalimot kun diin siya gikan ug nganong may kinabuhi siya hangtod karon, kundi bisan ang mga kabus ug timawa.

Ang mga tawong nakaila sa Dios, gihatagan og prayoridad ang  pagdayeg ug pagpasalamat ngadto sa Magbubuhat kay sa Iyang binuhat.

Kabus ka man ning kinabuhia ug kuwang ka sa kaalam, apan kumo kay may kinabuhi ka, angay mong isaludo ang imong gininhawa ngadto sa naghatag niini busa nakadangat ka ning buwan sa Disyembre.

Ang imong kabantog tungod kay maalamon ka, Iya kana sa Dios ug di nimo Siya ikapanag-ing ni bisan kinsang maayong laki o kaha giila nimong puli Kaniya nga imong giludhan ug giampoan tungod kay ang Dios, usa ra ug Kaniya lamang angay kita mag-alagad .

Sa ilawom sa langit wala Siyay laing gitugotang ipasimba sa tawo kundi ang Iyang anak nga si Kristo ug inigkasipyat sa tawo , kun mapakyas sa pag-ila sa matuod nga Dios ug sa Iyang anak nga si Kristo, si Yawa na ug ang Iyang mga sagabay maoy imong gialagaran, gisimba ug gipasalamatan. Tinuod nga angay maglipay ug magmaya ang tanan inig-abot sa Disyembre, apan sa atong kalipay, pahinungdan nato ang naghatag kanato og higayong maglipay-lipay ta, nga mao ang Dios kay sa higayong makalimot kita Kaniya , nagkahulogan lamang nga wala kitay tahod Kaniya ug wala kitay utang kabubut-on Kaniya nga maoy naghatag kanato og kinabuhi, kaalam ug bahandi. Di ba?