Tinguhaa nga ang imong tumong imoha gyud

Daghan kanato ang nihimo og usa ka pagkab-ot og mga tumong nga kun atong pamalandongan, dili diay atoa kundili ang gihimong tumong sa uban alang kanato. Sama pananglit sa usa ka batan-on nga human sa high school ang gipatungha og abogasiya dili tungod kay kini mao ang iyang tinguha ug pangandoy kun dili tumong ug pangandoy sa iyang amahan nga buot unta nga mamahimong usa ka abogado. Ang batan-on wala’y igong kaisog nga supakon ang maong manipulasyon sanglit, mahimong dili siya patunghaon sa kolehiyo kun siya magdumili sa maong hangyo. Mamahimo siyang abogado apan wala kini magpasabot nga siya magmalipayon ni makita niya ang maong kahimtang ingon nga usa ka duso nga naghatag og kahulogan sa iyang kinabuhi.

Mao nga haom kaayo ni bisan kinsa nato nga pilion ang bisan unsa nga makalipay nato ug makahatag nato og kahulogan. Mahinungdanon kaayo nga pilion nato ang kinabuhi nga naghatag kanato og katagbawan bisan pa man kun kini ang nagkahulogan og usa ka dakong pagsupak sa kadaghanan. Ang mahinungdanon wala kay gibinuangan ug nahimo kang hamtong ug responsable sa imong binuhatan.