EDITORYAL - Ayaw kabalaka kun mabuthan

Ang taga DOH wa manungo, apan gipasalig nila nga kutob sa madisgrasya sa pabuto karong Pasko ug Bag-ong Tuig andam na ang tanang tambal sa samad.

Sa ordinaryong paso sa pulbura naa, tambal sa ordinaryong samad naa, tambal sa mapisok ang mata naa para lugit, tambal sa magtungay-tungay nga mga kuyamoy naa, tambal sa bukog nga madutlan sa pabuto naa para gabas niana, kun makabsan sa kinabuhi, aw daghan kaayong punerarya nga mag-ilog pagbalsamar.

Apan di ikatambal ang tambal kun way mga doktor, busa on call sud sa 24 oras ang tanang kawaning doktor sa mga tambalanan ilabi na sa mga hospital sa goberno aron moatiman sa madisgrasya.

Unya aron di mosamot ang kasakit sa samad ug kaguol sa nahitabo, tanang mga lawak sa tambalanan sama sa Cebu City Medical Center ug sa Vicente Sotto Memorial Medical Center pahumotan pag-ayo, mga bedding sa katre, habol ug unlan puti kaayo buwahan di hugawan magtan-aw ang pasyente.

Pamasin nga gumikan sa kaanindot sa ambience sa maong mga lugar dali rang maulian ang pasyente aron ikapangandam pa ang iyang lawas ug kalag sa laing binuthanay sa Pasko sa 2012 ug Bag-ong  Tuig sa 2013.

Ang pabuto tradisyon nga gitudlo sa relihiyong namat-an og kahayag nga maoy pambugaw sa mga dautang espiritu.

Ambot mga maldito ra ba nang mga espirituha , di ba kaha sila magpunay og tuwad-tuwad og katawa kun mapungkol ka na unya moingon pa nga gigabaan ka kanila kay imo silang gibungog sa imong pabuto.

Apan may tambag ang taga DOH nga di lamang pabuto ang makapabahag sa ikog sa demonyo nga si Satanas, kundi ang mga torotot, lata nga guyoron, baril nga bunal-bunalan , kaldero nga bunalan   og martilyo ug uban pang mga saba-saba nga makapaislag sa Yawa ug mosirit og dagan pahilayo kay alingugngogan niana.

Unya kun ang Yawa sabaan, ikaw nga naghimo sa ingon wa sabai niana di ba kaha makaingon si Satanas nga mas dautan ka pa labaw kaniya. Di ba?