Walay dag-anan

Gihimong isyu sa mga kritiko sa administrasyon ang pagpanaway ni Presidente Noynoy Aquino ngadto sa Korte Suprema bisan anaa ra sa duol si Supreme Court chief justice Renato Corona atol sa usa ka justice summit sa kauluhan.

Ang mga pagsaway ni Noynoy nagsentro sa mga desisyon sa Korte Suprema nga nagpabor kanunay sa miaging administrasyon.

Gisaway ni Noynoy ang Korte Suprema tungod sa pag-nullify niini sa Truth Commission, nga giumol sa administrasyon nga Aquino aron unta mo-imbestigar sa mga kahiwian nga nahimo sa pamunoan ni kanhi Presidente Gloria Macapagal-Arroyo.

Laing gisaway ni Noynoy ang pag-isyu og temporary restraining order (TRO) batok sa watchlist order nga giisyu sa Department of Justice batok kang Gloria nga mogawas na unta sa nasud aron magpatambal sa iyang sakit.

Gihimo kini ni Noynoy bisan anaa ra sa duol ang labaw sa Korte Suprema, ug sa mga nanambong sa usa ka kalihukan sa mga justice sector stakeholders sa nasud.

Apan wala mupatol si Corona sa mga pagsaway ni Noynoy.

Hinuon, nanggawas ang mga pagsaway batok kang Noynoy kay matud pa, nagpakita kini sa kawalay respeto ni Noynoy kang Corona ug sa mga mahistrado sa Korte Suprema.

Adunay uban nga mihulagway sa gihimo ni Noynoy nga usa ka pagpangatake sa ehekutibo ngadto sa hudikatura, nga dili unta angayan mahitabo tungod sa prinsipyo nga ang duha ka sanga sa gobyerno angayan magrespetoay sa usa’g usa.

Apan maayo unta nga hinayhinayan og pamalandong ang mga panghitabo sa nasud una kita mosudya kang Noynoy nganong nahimo niya kadto.

 Ang iyang mga pagsaway humana saw-i sa publiko isip lehitimong isyu. Ang Truth Commission usa ka maayong lakang sa Malacañang aron mahibaw-an ang kamatuoran – kun nangawkaw ug nanikas ba gyud si Gloria pinaagi sa pag-abuso sa iyang gahum isip presidente.

Apan unsay gibuhat sa Korte Suprema? Mirespeto usab ba sila sa lakang sa Malacañang?

Kun moingon kini nga walay balaod o dili ka-suporta ang Konstitusyon sa katukoran sa Truth Commission, maayong hingut-an nila ang mga desisyon sa Korte Suprema sukad sa tuig 1901 nga adunay daghan nga wala masubay sa balaod ug sa Konstitusyon, apan nahimong sumbananan legal tungod sa literatura diha sa “ponencia” kon unod sa desisyon.

Ang nakadaot sa sistema, kay bisan dili mauyonan sa kinabag-an ang desisyon sa Korte Suprema, wala na kita’y mahimo pa kay mao na kini ang katapusan nga singgit sa hustisya. Kun dili mao ilang desisyon, wala na kita’y kadangpan pa.

Ang buhat sa lehislatura (Kongreso) ug sa ehekutibo (Malacañang) mahimong i-review sa Korte Suprema, apan ang buhat sa hudikatura (Korte Suprema) dili mahimong ma-review sa lehislatura ug ehekutibo. Dili maki-angayon nga sistema, apan kay “supreme” man lagi, sila nay hawod.

Bisan mag-unsa pa og paninguha ang administrasyong Aquino nga mapatuman iyang Tuwid na Landas, basta duna lay modala niini ngadto sa Korte Suprema, wala gyud gihapon kini silbi.

Ang Truth Commission ug ang pag-prosecute ni Gloria dili na bunga sa pantasya ni Noynoy nga iyang malupigan ang pamilyang Arroyo.

Unsa pa may makuha ni Noynoy ug pamilyang Aquino? Mahimo ra man siyang mo-concentrate sa mga programa sa pagpalambo sa atong ekonomiya pinaagi sa maayong pang-gobyerno, ug tipik sa maong programa mao ang paglimpyo sa gobyerno gikan sa mga kawatan nga mga opisyal.

Unsaon man paggukod sa mga kawatan karon kun ang kawatan sa miaging pamunoan nagtuyoktuyok ra gihapon sa atong republika nga makahimo sa paglumpag sa gobyernong Aquino pinaagi sa ilang gahum, kinawat nga bahandi ug impluwensiya?

Kun naninguha ang executive branch ni Noynoy nga malimpyo gikan sa korupsiyon ang Pilipinas, nganong pakgangon man sa judicial branch ni Corona ang maong paninguha?

Basin ganahan si Corona nga molungtad ang mga binuang ug korupsiyon sa gobyerno?

Moingon ang uban, ipasubay lagi kuno sa balaod ug sa Konstitusyon ang mga gipamuhat sa administrasyon aron molampos kini sa ilang mga tinguha batok sa kanhi presidente.

Ang akong tubag niini... estoryahe!

Kay ngano, tanan ba nga desisyon sa mga korte ug tanan ba nga desisyon sa Korte Suprema napasubay ba sa balaod o sa Konstitusyon?

Walay dag-anan kita sa Korte Suprema.