Ang nangagi nakalabay na kini ug wala na kita’y angay’ng kabalak-an niini ug ang maayong hunahunaon karon mao ang umaabot aron mouswag kita’s unahan. Ilubong ta na sa kalimot ang dili maayong binuhatan sa mga nanglabay’ng sayop diha sa atong mga lider ug likayan ta kining mga pamaaging “Atras-Abante”, kay wala kini silbe ug ning paagiha makadaginot pa kita sa mga takna sa atong pag-uswag.
Kun magpadayon kining pagsige ta’g tuki diha sa mga hiwing mga binuhatan sa atong kadagkuan sama da nga nagsige lang kita’g wiwe sa kaugalingon tang samad, unya magpanglingi kita’s agi ug mapuling na hinuon kita sa abug nga nagsunod kanato. Dugang kalisdanan natong mga Pinoy ilbi na kay 80 milyones na kitang kumakaon, ang mga abot ug maani diha sa atong kayutaan dili na kini paigo sa panginahanglan.
Pagpahinumdom lang kini kay wala’y husto, o perpekto sa tawo, kitang tanan mga masalaypon magpasayloay kita alang sa kasiguroan sa umaabot kay mangalisbo naman unya ang kabaho sa atong pagka-Pilipino mga limbongan, tulisan, kurakot ug wala na unya’y mosalig kanato kay lagi hi-tek naman kita karon ug ngadto na sa lainlaing kanasurang gawas dakung kaulawan kini natong tanan.
Sa napulo ug lima nang mga napiling pamuno nasud sa Pilipinas lakip na kini si PNoy, silang tulo – Marcos, Estrada ug Arroyo mao ray kulatado kaayo pero sila baya dako usab kaayo’g natampong mga kaayohan sa nasud ubos sa ilang pamunoan naa atong makita ug mahikap. Busa angay sab silang atong pasidunggan ug dayegon diha sa ilang mga binuhatan ug dili pakaulawan kay ang politika –pulipulig tikatika, kita ray giluto sa kaugalingon tang mantika.