EDITORYAL - Ang Filipinong patyonon sa China

Kun misuway man og hangyo ang Malacañang nga ipaangan-angan una ang pagbitay sa usa ka Filipinong nangahente og gidiling drugas didto sa China, di kini usa ka pinugsanay kundi maingon nalang usab nato nga komplemento nalang sa gobyerno alang sa mga tagi-lungsod nato nga makasala didto sa laing nasud.

Kay ang balaod, balaod gyud ug way usa ka nasud nga manghilabot sa balaod nga gipatuman sa laing nasud o kun ingon niana mahimo kang tawgon nga mahilabtanon, kay di baya usab ta gusto nga sa atong bahin diktahan ta og taga laing nasud.

Ang pagpamaligya og gidiling drugas usa ka krimen nga takus kaayong silotan og labing bug-at nga silot ang nagbuhat sa ingon, ug mao ang silot nga kamatayon didto sa China.

Busa kun patyon man sila makatarunganon lang kay ang ilang kinabuhi kuwang pang ibayad sa mga kinabuhing nahanaw tungod sa ilang gidalang produkto nga makamatay.

Gumikan sa gidiling drugas sama sa shabu, cocaine ug uban pa, pila na ka tawo ang nalisoan sa maayong pangisip, pila na ka tawo ang nahimong tulisan, rapist, killer, ug pila na ka kinabuhi ang gipatay sa mga tulisang tiggamit og gidiling drugas, pila na ka kinabuhi ang gipatay sa killer nga tiggamitan og illegal drugs, pila na ka babaye ang gilugos ug gipatay sa tiggamitan sa illegal drugs, pila na ka amahan, inahan nga gipatay sa anak nga drug addict o kaha vice versa. Sa laktud unsa ka bug-at ang sala sa tawong negosyante sa gidiling drugas.

Ang pagpamatigayon sa gidiling drugas ug ang tiggamitan niini pulos matang sa krimen   nga di na angay untang hatagan og luna nga makalipang dinhi sa ato.

Ang pagpatambok kanila sama ra nga mitugot kang hikogan ang kaugalingon nimong katawhan sa maong matang nga kriminal.

Busa may nawong ka pa ba nga mosanta sa ubang gobyerno nga mopitol sa kibabuhi sa imong tawo nga nagpayuhot og  illegal drugs sa laing nasud. Di ba?