Ang bilihong pinaskohan

Nagkaduol na ang atong pagsaulog sa Pasko ug niining panahona ug dili ikalimod nga daghan kanato ang mahinamon kaayo nga makadawat og pinaskohan gikan sa tagdumala sa gitrabahoan natong buhatan o mga higala.

Ang pagdawat ug ang paghatag og pinaskohan niining maong mga adlaw maoy makahatag kanato og kamabulukon sa maong kasaulogan ug mahimong daw mingaw ang maong mga adlaw kun mapakyas kita sa pagdawat sa atong gilauman.

Gumikan kay sagad kanato maoy gihatagan og gibug-aton sa maong kasaulogan ang material nga mga butang sa atong pagpakabuhi niini dili atong kalibutan ug hinikalimtan nga kining tanan lumalabay lamang.

Atong makalimtan ang labing bililhong pinaskohan nga gihatag kanato sa Labaw’ng Makagagahom atol usab niining kasumaran sa iyang adlaw nga natawhan.

Ang labing bililhong butang nga atong pinaskohan nga dili ikabaylo sa material nga butang mao ang atong kahimsog sa panglawas ug ang paglikay kanato sa bisan unsang matang sa katalagman.

Kay mag-unsa man ang nagtipun-og mong gidawat nga pinaskohan kun naghambin ka og bug-at nga balatian niining adlaw sa iyang kasaulogan?

Sa laktod mahimong walay kapuslanan ang tanan apan kun maayo ang panglawas ug anaa kita sa maayong pagkabutang mahimo lamang gihapong mabulukon ang maong adlaw sa kasaulogan sa pasko.Nunot niining maong kahimtang kita magpasalamat sa Kahitas-an nga sa tibuok tuig natong pagpakabuhi sa kalibutan kanunay kitang gilikay sa mga kadaut ug naato ang kamalinawon sa pagpuyo.