Ang nag-aginod nga ligid sa kaso

Gimando ni Ombudsman Conchita Carpio Morales ang pagpasaka og kasong graft and corruption batok kang kongresista Arturo "Boy" Radaza sa lone district sa dakbayan sa Lapulapu tungod sa pagpamalit niini og 470 ka mga personal computers alang sa National ug Public High Schools sa dakbayan sa Lapulapu nga gipaburot ang prisyo kaniadtong tuig 2005 sa dihang siya pa ang mayor sa nahisgutang dakbayan. Apil sa gipasakaan og kasong graft and corruption mao ang mga sakop sa Bids and Awards Committee ug Technical Working Group.

Sa gihimong imbestigasyon sa Ombudsman Visayas nasuta nga gipaburot nila ni Radaza ang prisyo sa 470 ka mga computers nga ilang gipamalit gikan sa tag 23,100 pesos lamang matag usa ngadto na sa tag 49, 950 pesos ang matag usa. Nasuta usab sa imbestigasyon sa Ombudsman Visayas nga ubos ang kalidad sa mga computers nga gipalit sa maong gidak-on sa kantidad.

Tungod niini gimando na ni Ombudsman Conchita Carpio Morales ang pagpasaka og kasong Graft and Corruption batok kang kongresista Boy Radaza ug mga kaubanan didto sa Sandiganbayan. Hinoon ang Ombudsman mirekomendar og tag 30,000 ka pesos nga piyansa sa matag usa ka akusado aron sila mahatagan og temporaryong kagawasan.

Porbida! Pagkahinay gyod nga motuyok sa ligid sa hustisya dinhi sa atong nasud. Sayonan mo, mayor pa si Boy Radaza ning kasoha nga gipasaka batok kaniya didto sa Sandiganbayan, nakongresista na lang si Radaza. Miabot pa og unom ka tuig una pa siya mapasaka-i og kasong graft and corruption. Maayo gani kay naabtan pa ning kasoha si Boy Radaza nga buhi pa. Ambot og pila na upod ka tuig ang atong paabuton diha sa Sandiganbayan sa pagpakanaug sa ilang hukom sa pagkonbikto o ba kaha sa pag-absuwelto sa mga akusado. Mao nay giingon, atangi!