Good luck sa bag-ong bombero

Pormal nang nanumpa ang 37 ka bag-ong bombero niadtong Disyembre 1, 2011 nga gipahigayon sa rehiyonal nga buhatan sa Bureau of Fire Protection (BFP) 7 diin mismo ang among Regional Director SR SUPT MA. LUSIA C HADJULA ang nangulo sa maong pagpanumpa.

Kun kahinumduman, daghan kaayo ang aplikante nga buot mamahimong sakop sa among ahensiya apan lagi tungod kay limitado raman ang slot alang sa BFP 7 gipili gayud ang labing kwalipikado aron molangkob sa 37 ka bakanteng posisyon.

Sa kadtong wala madawat ayaw kamo kabalaka kay sa January 2012 puhon dunay laing recruitment ang mahitabo.Basin pa og madala na gyud kamo. Ug ngadto sa bag-ong sakop sa BFP 7 good luck sa inyong gipili nga karera.

Hinaut nga wala kamo masayop sa pagpili o ba kaha sa pagsulod sa pamombero. Sa makadaghang panahon atong madungog nga ang bombero usa ka noble profession ug tukma lang siguro nga inyong hatagan og bili ang inyong mga gipanumpa nga mao ang paghatag sa publiko sa labing taas nga kalidad nga serbisyo publiko. Sa among mga bag-ong kauban sa buhat, welcome to BFP Region 7.

Sa pikas bahin, subsob na ang among pagpangandam alang sa ika-38 nga Fire Service Recognition Day nga ipahigayon karong Disyembre 6, 2011 ngadto sa Grand Ballroom sa Cebu Grand Hotel. Ang maong kasaulogan tambungan ni Secretary Jesse M Robredo sa Department of the Interior and Local Government (DILG) nga maoy magsilbing Guest of Honor and Speaker.

Sanglit usa man kini ka mahinungdanong okasyon, tukma lang nga hatagan og pasidungog ang mga miyembro sa BFP-7 nga mipakita og talagsaong labok aron mahatag ang labing taas nga kalidad sa serbisyo publiko.

Lakip sa mga hatagan og pasidungog mao ang mga nagkalainlaing Local Chief Executives nga dako kaayo og natampo aron sa pagpalambo sa kabomberohan sa ilang tagsatagsa ka lugar pinaagi sa pag-donar sa yuta nga maoy gitukoran sa mga fire stations pag donar og fire trucks ug uban pang mahinungdanong mga tabang.

 Hinaut nga daghan pa unya nga mga local chief executives ang mosunod niining atong mga awardees aron mosamot pa kalig-on ang pwersa sa BFP 7.

Sa kataposan, karong Lunes na (Disyembre 5, 2011) ipahigayon ang kataposang hugna sa pagtimbang sa atong labing unang Biggest Loser BFP 7 Edition. Ang maong final weigh in himuon sa rehiyonal nga buhatan sa BFP 7.