Tinuod ba ni?

Tinuod ba kining akong nadunggan nga ang developer sa Ciudad Project buot mosuborno ni Kongresista Tomas R. Osmeña aron dili na babagan ang pagmugna sa proyekto diha sa barangay Apas.

May usa man gud ka suod ni Osmeña nga mitug-an nako nga ang developer sa Ciudad Project nagpadala og daghang motorsiklo ngadto sa balay ni Tommy, apan gibalibaran sa kongresista.

Giingnan kuno ni Tommy ang nag-deliver sa mga motor nga kun dili gani kuhaon gikan sa iyang balay sa Guadalupe ilabay kini paghurot sa dagat. Gianugnan lagi ang mga suod ni Tommy kay motor na gud unta kini nga ilang magamit.

Bi, mangutana kita ni Allan Dino nga dunay sakyanan nga ang plate numbers 777 kun bakak ba kining inpormasyon nga miabot nako.

* * *

Apan sa ako na nga giingon sa nahauna nako nga mga lindog, nindot baya usab kining Ciudad Project basta ayuhon lang nga dili makamugna og problema sa trapiko.

Kadtong mosupak pagmugna niining maong proyekto, hala siguroa nga makatambong kamo sa public hearing nga gitakda sa Department of Environment and Natural Resources (DENR) karong adlawa anha sa Apas barangay complex.

Han-aya pag-ayo ang inyong mga argumento kun nganong supak kamo sa maong tinguha kay ang mga representante sa developer dugay ra kaayo nga nag-andam sa ilang mga argumento.

Unya awhagon nato si Mr. Dino nga tubagon ang argumento ni Tommy nga bakak ang ilang pasalig nga daghang makatrabaho nga taga dakbayan sa pagmugna nila sa maong Ciudad Project.

Basi sa pamahayag ni Tommy nga kaniadto dunay mga construction project ang mao nga developer apan wala kini manguha og mga tawo nga taga dakbayan sa Sugbo.

Kini man gud ang usa nga gihaylo sa developer nga kun tugotan sila nga makatukod sa Ciudad Project makahatag kini og trabaho sa mga taga dakbayan sa Sugbo.

* * *

Duha ka polis akong nasundan nga nag-angkasay pagsakay og motorsiklo didto sa Gorordo Avenue. Midayeg ko sa maong mga polis kay bisan og sila nag-uniporme, nagsul-ob g’yud sila og helmet ug hitsas sa accessories ang ilang gisakyan nga motor.

Gisunod nako ang duha ka polis nga nag-angkasay sa usa ka motor. Paghunong sa eskena Gorordo Avenue paingon sa Perpetual Soccour Hospital, akong gidayeg sila sa ilang pagkamatinumanon sa balaud.

Ang nag-drive miingon nga angay g’yud sa polis nga maoy maghimo nga ehemplo kon sumbanan sa katawhan. Husto g’yud kaayo. Dili sila sama sa usa ka polis nga anaa madistino sa Tourist Police Unit, kang kansang opisina anaa duol sa City Hall nga ang motor walay plate numbers, walay tail light, ug walay side mirrors.

Abusado kaayo ang maong polis. Kun kinsa man ang tag-iya o giisyuhan sa maong sakyanan. Awhagon nako ang hepe sa Tourist Police Unit nga susihon kining abuso sa iyang sakop. Palihug lang.

Awhagon usab nako ang higala ko nga si Senior Superintendent Melvin Ramon Buenafe nga maoy direktor sa Cebu City Police Office nga ipasusi niya kining maong abuso sa usa niya ka polis.

Alang gud nako dili g’yud maayo nga ang usa ka tigpatuman sa balaud mao mismo ang mag-una-una nga dili motuman sa balaud. Makaagni kini sa mga ordinaryo nga tawo nga mosundog sa iyang gihimo.