Ligid sa hustisya

CEBU, Philippines - Mahimo man diay nga mopaspas ang dagan sa husay sa korte kung tinud-on lang gyud sa gobiyerno. Apan kini anha lang mahitabo sa mga adunahan o ba kaha mga dagkong tawo sa katilingban ug dili kini matagamtaman sa mga pobreng nangita sad og hustisya.

Sama na lang sa nahitabo karon sa kaso ni kanhi presidente nga karon Pampanga representative Gloria Macapagal Arroyo nga sa mubo lang nga panahon napasakaan og kasong electoral sabotage ug napagawsan dayon og warrant of arrest.

Daghan ang nakaingon ug bisan na gani ang mismong kampo ni Arroyo nga tulin pa sa ‘bullet train’ ang dagan sa kaso niini. Gikan sa pagpasaka sa kasong electoral sabotage ngadto na sa pagpagawas sa warrant of arrest.

Dili ingon niini kapaspas sa tinud-anay lang ang atong mga korte, hinuon daghan man usab ang nakauyon sa kalamboan sa maong kaso. Wala hinuon kini nagpasabot nga sad-an na gyud si Arroyo tungod lang ani.

Naghatag gyud kini og kahigayonan kaniya sa pagtubag sa mga alegasyong gibato kaniya. Maayo kini alang sa Pilipinas apan lahi sa pagtan-aw sa mga kabus nga adunay mga kaso.

Sa mga yamukmok nga mga tawo dili ingon niini kadali ang dagan sa ligid sa hustisya. Langay kaayo ug daghang mga kuskos-balungos nga makapadugay sa pagkab-ot sa hustisya sa mga nabiktima ug lakip na sa mga nabilanggo.

Daghang mga kasong nagtipun-og sa mga korte dinhi sa nasud nga wala pa gyud mahusay, pipila niining mga kasoha gani nangamatay na lang mga hingtungdang mga tawo apan sa ilang papel atoa pa sa kinailawoman.

Ang nakapait ini kung ang sinumbong inosente sa pasangil batok kaniya ug walay ikasarang aron makakuha og arang-arang nga abogado kay dili baya baratilyo ang mga de-kampanilyang abogado.