Killer road

Di’ makatuo si Gerard Yaun nga ang usa unta ka malipayong adlaw alang sa iyang pamilya, maputos sa grabeng kasub-anan. Ang graduation sa iyang kurso sa welding ang usa sa gipaabot sa iyang amahan nga si Atty. Rogelio Yaun apan ang tanan, sa takulahaw lang napapas tungod sa usa ka dakong aksidente sa kadalanan. Namatay ang amahan ni Gerard nga maoy nagmaneho sa multicab samtang nagpaingon silang duha sa graduation ceremony sa usa ka welding school. Si Gerard nag-antos sa mga samad sa ulo ug bukton. Silang duha ang pipila lang sa mga nabiktima sa dakong disgrasya sa may eskina Canduman ug North Road sa dakbayan sa Mandaue sa miaging adlaw.

Di’ na bag-o ang maong matang sugilanon sa giisip nga ‘killer road’ sa dakbayan sa Mandaue. Ang nahitabo niadtong Martes, usa lang sa nagkadaghang kaso sa aksidente nga nahitabo sa susamang lugar su’d na sa dugay nga panahon. Kun ang drayber sa ten-wheeled truck nga si Victorino Bitoon ang pangutan-on, nawagtangan siya og brake ug wa’ na niya kapugngi ang paspas nga pagdagan sa higanteng sakyanan nga iyang gimaneho ug didto ni nibangga sa multicab nga nibangga sa lain pang mga sakyanan. Sa kinatibuk-an, walo ka mga sakyanan ang nadaot, pito ka mga tawo ang samdan ug usa ka kinabuhi ang nakalas.

Giingon nga di’ kalikayan ang disgrasya. Apan mahimong malimitahan ang epekto niini pinaagi sa paghimo og mga lakang aron nga kapugngan ang duguon ug makamatay nga epekto sa aksidente. Apan ang sitwasyon sa eskina Canduman ug ang disgrasyang nahitabo sa miaging adlaw, di’ na bag-o sa maong dapit. Sa panahon nga adunay laing insidente nga motumaw, makaingon ‘ta nga kapalpakan na sa lokal nga kagamhanan ug mga hingtungdan nga ahensya nga sunod-sunod nga disgrasya nga di’ lang niguba sa mga kabtangan apan nikalas pa og mga kinabuhi. Ning bag-o, usa gyud ka abogado ang nakalas.

Matud sa drayber nawagtangan siya og brake. Apan lalisunon pa ang maong pasangil tungod kay kung imong tan-awon, nganong nahimo man niya ang pagpahunong sa ten-wheeled truck pipila ka metro ang gilay-on gikan sa panagbangga nga wa’ na kinahanglan nga ibangga niya ang sakyanan sa poste, pader ug di’ ba kaha balay. Ang disgrasya sa maong lugar di’ na maihap ug angayan nang malisang ang mga lokal nga opisyal tungod sa sunod-sunod nga panagbangga. Apan kung buot sa mga opisyal nga kalimtan lang ang maong insidente, ugma damlag di’ halayo nga laing kinabuhi na ‘sab ang makalas.

Sukad nga gibuksan ang Cansangga bridge daghan ang nalipay tungod kay maluag-luagan na ang huot nga dagan sa trapiko gikan ug paingon sa lungsod sa Consolacion. Apan human gibuksan ang bag-ong da’n nga mahimo untang alternatibong kaagian, susamang kahuot sa trapik gihapon ang nasinati ug daghan gihapong disgrasya ang natala. Ang pagdili sa mga higanteng truck sa pagsu’d sa north road Mandaue ang labing epektibong lakang aron kalikayan ang grabeng trapiko ug mamenosan ang mga disgrasya. Kung susihon ang talaan sa traffic enforcers sa Mandaue, motumaw nga sagad sa mabanggaan sa mga ten-wheeled truck mas kritikal ang kinabuhi sa mga pasahero ug mas gusbat ang mga sakyanan nga mabanggaan. Ang labing epektibo ug labing maayong lakang nga himuon mao ang pagdili sa mga dagkong truck sa pagsu’d sa highway Mandaue ug pagpagamit nila sa Cansangga bridge gikan ug paingon sa lungsod sa Consolacion.

Apan disiplina ang labing epektibong solusyon sa problema. Mag-unsa man ang kadaghan sa alternatibong da’n nga ihatag sa mga motorist ug unsay silbi sa daghang traffic enforcer nga ipakatap sa kadalanan kung wa’y disiplina ang mga drayber ug mismong mga tawo nga mosakay ug magpataka lang sa paglabang sa kadalanan. Kung mopatigbabaw ang ka wa’y disiplina sa mga tawo--- magpabilin ang gitawag nga killer road sa Mandaue.

Email: [email protected] or [email protected].