Mura man og takilid ang umaabot nga kapalaran sa atong mga mamumuo sa panakay sa barko kay wa man diay korehii sa mga eskuylahan sa maritime dinhi sa nasud ang ilang mga depekto aron mosakar ang hiantigohan sa ilang mga estudyante sa panginahanglan sa mga employer sa Uropa.
Ang pangimpleyong panakay sa barko dako kaayo og gikatampo sa ekonomiya sa nasud di lamang sa direktang buhis nga gihatag sa empleyado ngadto sa panudlanan sa buhis sa kagamhanan kundi sa ilang pagpuyo ug sa edukasyon sa ilang mga anak.
Apan niining mga higayona nga nagkadaghan ang kakompetensya sa Pilipinas sa natad sa panarbaho sa barko sa gawas kon seafarer labing gipahigpitan sa mga employer nga taga EU ang mga requirements sa mga eskuylahang nagtudlo og mga maritime sa Pilipinas.
Diin sa higayong di pasado ang mga kurso nga gitanyag sa mga eskuylahan sa maritime dinhi subay sa gipatuman sa European Maritime Safety Agency (EMSA) aw tataw kaayo nga di na usab dawaton sa panarbaho sa gawas ang mga estudyante niini.
Unya dugay naman diay’ng gipahibawo ang mga eskuylahan sa pamarko dinhi apan hangtod karon wa man tagda ug sagopa ang mga koreksyon nga gitudlo kanila hinungdan nga nahimong dehado karon ang kahimtang sa ilang mga estudyante kay di naman mo-hire og mga Filipinong seaman ang mga employer sa Uropa kay di naman kwalipikado sa EMSA ang mga eskuylahan dinhi nga ilang gitunghaan.
Gumikan sa maong pagkuwang sa maong mga tag-iya sa eskuylahan mahug og way kapuslanan ang pagpaeskuyla intawon sa mga ginikanan sa ilang mga anak kun wala nay modawat nga langyaw’ng trabahoan kanila tungod kay depektuso ang mga kurso sa eskuylahan nga ilang nasudlan.
Mura man og panurambaw ning sa mga tag-iya og eskuylahan nga bisan diay kun patak-opan na sila kay wa sila makatuman sa mga panukdanan nga gitakda sa EMSA nagpadayon man gihapon sila pagdawat og mga estudyante bisan kun di na dawaton sa panarbaho sa gawas. Di ba?